Nimin chawhnu khan Lunglei Town Sanitation Task Force chu Lunglei Additional DC Pu David Liansanglura Pachuau hovin an thukhawm. Solid Waste Management Rules, 2016, The Mizoram Solid Waste Management Bye Laws 2018 leh faina kawnga hmalak zel dan tur an rel ho. Meeting-ah hian a kaihhnawih sawrkar department hrang hrang hotute, tlawmngai pawl aiawhte leh khawtlang hruaitute an tel a ni.

Meeting-ah hian kum kaltaa Lunglei Town Sanitation Task Force hmalakna hrang hrang thlirletna leh sawihona neih niin bawlhhlawh sawngbawl leh paih chungchanga Dan Solid Waste Management Rules, 2016 leh The Mizoram Solid Waste Management Bye Laws 2018 te chipchiar taka zirho a ni a. Solid Waste Management Rules, 2016 hi India ram pum a faina lama hmalakna tura Central Sawrkar Dan siam a ni a. He Dan siam hnuaiah hian Central Sawrkar, Central Pollution Control Board, State Sawrkar, State Pollution Control Board, District authority, Local Authority tan te mawhphurna hrang hrang leh an tih tur te hunbi (timeline) neia siam sak an ni a. Solid Waste Management Rules, 2016 hnuaiah hian The Mizoram Solid Waste Management Bye Laws 2018 siam niin meeting ah hian he bye law hman dan tur chungchang te sawiho a ni a. Bawlhhlawh paihna man chawi tur zat rate te thlirho niin kalkhawmte, a bik takin veng hrang hrang VCP ten bawlhhlawh paihna rate awm tawk an tih te sawihovin rate an pass nghal a ni. Bawlhhlawh paih man hi in tinin thla khatah Rs 50-Rs 100 (bawlhhlawh paihna hmun atanga a veng hlat dan a zirin) chawi se tih rel a ni a. Dawr, Restaurant, guest house, hotel, hostel, office ten thla khatah Rs. 150/- an chawi thung ang. Tin industry, go down, storage house, clinic leh laboratory, auditorium, etc ten thla khatah Rs. 200/-  an chawi dawn a ni.