Dr. R. Lalthangliana, Minister Health & Family Welfare, Commerce & Industries leh Higher & Technical Education Department chang tu chuan tukin zing khan Hnahthial thlengin Hnahthial District tihpuitlinna tura Hnahthial khawpui chhunga Department hrang hrangte dinhmun chipchiar takin a enfiah.

Health Minister hian KVK, SDAO, PHE, BDO, SDO (C), SDEO, Soil DO, Forest RO, SDPO, P&E, Horticulture, ICDS, RD Rest House, FCS&CA Godown leh I&PR hmun hma enfiahin heng office a enfiahnaah te hian office thawktuten lo dawng sawngin an mamawh te a hnenah an thlen nghal a ni. Hemi hnu hian Sub District Hospital Hnahthial-ah Official te meeting a neihpui a, hetah hian thu sawiin department hrang hrangte dinhmun kan hmu a, 80% ah chuan District Office dah theihna tur hmun a awm a, Deputy Commissioner bik erawh kan la nei rih lova, kan Chief Minister zahawm tak hian August thlaah District 3-ah hi chuan DC dah hman ngei a duh si a, hei vang hian mi in luah rih pawh a tul dawn a ni. Hospital bik tih chantlunna tur hian cheng vaibelchhe 13 vel a awm a, hei pawh hi hma kan la thuai dawn a ni a ti.

Minister chuan Department hrang hrang hotute hnenah an department chan theuh a, District office atana hmala tura a ngen tawh thu leh anni lam pawhin theih tawp an chhuahpui nia a hriat thu a sawi. Dr R Lalthangliana chuan Pathian zarah Hnahthial-ah tun kum 5 chhung hian hmel danglam tak kan neih ka beisei tlat a, chumi atan chuan Department hrang hrang te, khawtlang hruaitu, NGO leh bial mipuite tawiawmna kan mamawh hle dawn a ni a ti bawk.

Health Minister hi, Dr. F. Lianhlira, Principal Director H&FW Dept. Pu HD. Lalrintluanga, Joint Director (Commerce Wing), Pu Lalsawma Pachuau, Joint Director (F&D) H&FW Dept. bakah Lunglei atangin SE, P&E, SE PWD, CMO, Dy SP bakah Hnahthial-a Official leh khawtlang hruaitu ten an tawiawm a ni.