387/2022-2023

Dated Hnahthial, the 3rd May, 2022: Vawiin khan Dr. R. Lalthangliana, Minister, Commerce & Industries, Higher & Technical Education, Health & Family Welfare etc., leh bialtu MLA ni bawk chuan Voltas Malsawm House- MFA Inter District Junior Boys Football Championship chu HDFA Ground Hnahthial ah a hawng.

A hawnna inkhawm tawi buatsaihah Minister chuan, inter district football championship 2022 a hlawhtlin theih nana thawktute chungah te, sum leh paia tanpuina petu bulpui (Main sponsore) Voltas Malsawm House leh midangte chungah te lawmthu sawiin, Sports Minister zahawm tak Pu Robert Romawia Royte leh Sports department te thawhrimna zara ground tha tak nei thei kan ni a. Vawiinah hian an chungah lawmthu kan sawi nawn leh a ni, a ti. Dr. R. Lalthangliana chuan, hman ni lawkah Inter District Volleyball Championship tha taka kan thlen tawh hnuin tunah Football Championship kan han thleng leh ta a. Hei hian Hnahthial district in hma a sawn chakzia leh mipuite tanrual thatzia a tichiang hle a ni. Kan hriat angin kum 2019 ah district thar kan ni chauh kha a nia, hripuiin min tihbuai zui bawk a. Nimahsela Pathian leh mipuite tanrualna zarah hripui dona hna pawh tha takin kan thawka, a theihna ang angah hmasawnna hmel pawh kan hmu chho zel bawk. Hnahthial Ground leh a chhehvel tihhmasawn ngai la awmte pawh rawn thawh thuai tumin hma kan la zui zel a. Tin, Pavillion leh a panna kawng siamna tur pawh kan dap zui zel a ni, a ti. Minister hian Hnahthial district chhung mi, infiamna lama India rama hriat hlawh phak tam tak an lo awm tawh thin tih sawiin, he district atang hian infiammi tha tak tak an la chhuah zel pawh a rinawm hle a ni, a ti a, he championshipa tel district 11 atanga lokal players zawng zawngte duhsakna a hlan a ni.

Thu a sawi zawhin Kick-Off na a nei a, Championship senso zualpui phuhruk nan pawisa fai Rs. 100,000 leh Goal Net pahnih leh Football pathum a hlan bawk a ni.

Khualzahawm Pu PC Vanlalhruaia, Sr. Vice President, MFA pawhin thusawina hun a hmang bawk.

A hawnna inkhawm hi Pu H. Hmingthanzuala, President, Hnahthial District Football Association chuan a kaihruai a, 9th May, 2022 ah final khelh tura ruahman a ni.

Attachment

  • Loading attachment...