No.3999/2021-2022

Aizawl 15th February, 2022 : Dr. R. Lalthangliana, H & FW Minister chuan vawiin khan Civil Hospital, Aizawl a Doctor Seminar Room ah MJA member te tana Free Health Check-up buatsaih chu a hmawr bawkna a hmanpui. Free Health Check-up hian MJA member 50 vel ten 8-15 February, 2022 chhung khan test leh investiga­tion hrang hrang an lo nei tawh a. Hetianga MJA tana Free Health check up hi 2010 atang khan Civil Hospital hian a lo buatsaih thin tawh a ni. Vawiin inkhawm hi Dr. Lalhmuchhuaka, Medical Superintendent, Civil Hospital in a kaihruai a ni. 

Dr. R. Lalthangliana chuan MJA te hi Mizoram-in COVID -19 a hmachhawn kawnga tanpuiu pawimawh takte an ni, tiin lawmthu a sawi a. An hriselna te ngai pawimawha uluk taka inenkawl zel turin a chah a ni. Minister chuan COVID hripui leng kara Civil Hospital Aizawl a hmasawnna hrang hrang sawilangin Nephrol­ogy Department hawn thar a nih thu te, Cardiology Department tih changtlun nan sum beisei mek a nih thu te, MRI khawl dah thar thuai beisei a nih bakah tunah ICU ah khum 15 a awm tawh thu te a sawi a. Zemabawk-ah Cancer Superspeciality Hospital din nan JICA sum cheng vaibelchhe 500 senna tur pawh sawrkar laipuiin an pawm sak tawh thu sawiin, he hna hi bultan thuai a nih theih nan sawrkar laipui hnuaia Ministry hrang hrangah techni­cal committee khirhkhan tak tak paltlang fel a ni tawh a ti a. Cancer Hospital ah hian Inhemna Cobalt Therapy khawl thar bun thuai a beisei thu a sawi bawk. 

Minister chuan Doctor, Nurse leh Health Worker indaih lohna te sawiin, thingtlanga thawk tur Doctor contract a lak mai tur an awm lo chu pawi a tih thu sawiin tuna thawk mekte chuan theih tawp chhuah zel turin a chah a. Tunhnai maiah COVID 19 Omicron Variant Mizoram atanga sample thawnah 62 lai hmuhchhuah a nih thu sawiin MGDA leh IMA ten treatment protocol thar an buatsaih a ngaih tur thu a sawi a ni. 

Vawiinah vek hian Civil Hospital, Lunglei ah MJA member te tan Free Health Check-up buatsaih a nih thu sawiin Minister hian District hrang hranga MJA member te tan an awmna district a Sawrkar Hospital-ah Free Health Check-up an neih theih na turin ruahmanna siam nise a ti. Minister hian MJA ten an Golden Jubilee lawmnan Rs. nuai khat pek a tiam bawk a ni. 

Pu Zonunsanga Khiangte, MJA President pawhin thusawiin Civil Hospital-a thawktu chuangah hetiang an member te tana Free Health Check-up an neih sak thin hi lawmthu a sawi a ni.