3318/2022-2023

Aizawl, the 20th January 2023 : Dr R. Lalthangliana, Health & Family Welfare, Commerce & Industries leh Higher & Technical Education changtu minister chuan vawiin khan a department hmalakna leh hmachhawp thil pawimawh hrang hrangte  bawhzuiin sawrkar laipui a dawr.

Dr R. Lalthangliana hian vawiin khan Ministry of Micro, Small & Medium Enterprises (MSMEs) dawrin MSMEs Secretary Pu B.B. Swain-a hmuin Mizorama Industry hrang hrangte tihchangtlunna tur project hrang hrang, Luangmual (Aizawl), Lunglei, Champhai, Kolasib leh hmun hrang hranga factory complex dinna tura department-in Project an thehluhte an lo pawmsak avangin Minister hian lawmthu a sawi a. BB Swain-a hian MSME hnuaia Tourism cluster project hrang hrangte siam a, thehlut turin thu a lo rawn a, an lo bawhzui tur leh theihtawp an lo chhuah tur thu a sawi. 

Health Minister hian Health Ministry dawrin Special Secy Pu Gopalkrishnan leh official dangte kawmin Union Health Minister in ZMC Academic Block a hawn tur chungchang a sawipui a, RIPANS a infrastructure lam hna thawh mek (100-bedded hospital, Administrative building, Boys' & Girls' Hostel leh Auditorium te) a muan deuh avangin tlema lo enpuia, Ministry lamin an consultant te lo vil a, an hna lo tichaka sa zo vat turin a thlen a. Minister hian kum 2019 a Ministry a a lo nawr tawh Post graduate course thar 7 hawnna tur chu kan state mai bakah northeast pumin kan chhawr tur a nih avangin hna lak leh ṭul dangte lo tirang turin a hrilh a, Mizoramin para medical institution kan neih hi hmun dangah pawh state dangin an neih zen zen loh a nih avanga a ngaih pawimawh thu Minister hian thlenin, Ministry official te hian an lo bawhzui tur thu an lo hrilh.

Hemi hnu hian Minister hian NITI Aayog member (Health) Dr. VK Paul chu Mizoram mamawh te a sawipui a, ani hian Mizoram tana MRI khaw leina tur leh PHC ṭhenkhata X-Ray khawl leina tur an bawhzui mek thu a lo sawi a. Pu VK Paulan nikum lama Mizoram lo zin a meeting neih a tum a thulh leh tak avangin kumin February thlaah te meeting neih theih a beisei thu a lo hrilh bawk. Boeing company lamten CSR hmangin Nursing school dinna tur an ngaihtuahsak tur thu an lo sawi a, hma an lo lak zel tur thu an lo hrilh. 

Minister hian Ministry of Education a Economic Advisor Pu Mrutyunjay Behera leh MZU Southern campus changtu Joint Secretary te hmu leh a, anni hian a building sak leh infrastructure din chungchangah chuan Mizoram University in proposal rawn siam se kan lo ngaihtuah dawn nia tiin an lo chhang a ni. Minister hian RUSA changtu Joint Secretary Pi Saumya Gupta-i kawmin RUSA 3.0 chu an muangchang a tih thu a thlen a, ani hian Cabinet approval tura a file a kal mek thu leh pawisa kum thar atanga chuan RUSA pawisa chu a hman awlsam (flexible) zawka ruahman a nih thu a lo hrilh. 

Hemi hnu hian Minister hi Mizoram House ah Jeen Education Development Foundation Chairman Hemant Kumar Goyal leh an hotu dangte chuan Mizoram a Digital leh Skill University din chungchang an sawipui.