3319/2022-2023

Aizawl, the 21st January 2023 : Ni hnih awh Lammuala neih Pawl Kut chu vawiin khan a kharna hun hman a ni a, Chief Minister Pu Zoramthanga'n he hun hi Kut Pa niin a hmanpui a ni.

Kut Pa Pu Zoramthanga chuan Pawl Kut lawm leh hman chu chhunzawm zel a tha a tih thu sawiin vawiina thil phochhuah leh tihlan kaltlangin Pawl Kut pawimawhna tam tak naupang leh thangtharten an hriat a beisei tih a sawi. Mizo thawnthua kan hriat lar te chanchin lemchan a entir chu thil hlu tak a nih dan sawiin naupang tam takin Mizo culture a thawnthu te an hmelhriatin heng thawnthute hian zirtir ropui leh tha tak tak an neih te an hre leh zel chu naupang tan a hlawk leh zual nia a hriat thu a sawi lang bawk. Hmalaia Mizo te chanchin leh an nundana zirtur tam tak a awm a, hengte hi thangthar te kan zirtir leh hrilh a pawimawh a, chutianga tan chuan Pawl Kut chu hmang tangkai tha a tih thu a sawi bawk a ni.

Khualzahawm Art & Culture Minister Pu R. Lalzirliana chuan Mizo piputen naupang puala kut an neih kha hmanlai Mizoten naupang an ngaihpawimawh leh an ngaihhlutzia a tilang chiang hle tiin hnam nunphung leh ziarang zirtirna kalpui chu thil pawimawh tak a ni, a ti a. Changkanna leh hmasawnna hrang hrang avangin naupang leh thangthar ten kan hnam chin dan tha te, hnam ziarang leh kan culture hi an hre chang thei lovang tih a hlauhthawn awm a, chuvangin hetiang hun kan buatsaih leh hmang hi thil tul tak nia a hriat thu a sawi. Hmasang piputen huaisenna leh tlawmngaihna nena naupangte an chher dan kha a duhawm hle tiin Zonun zemawi lantir leh chhawmnun zel chu hnam damna nia a ngaih thu a sawilang bawk.

Kut Thlengtu Social Welfare Minister Er. Lalrinawma chuan Pawl Kut chu naupangte puala hmasang atanga Mizote Kut a nih angin he hun hmang tura lo kal naupangte chu hlim leh lawm takin Kut hmang turin duhsakna a hlan a ni.

Pawl Kut 2023 ah hian sikul hrang hrang naupangten Hnam lam te, a huhoa Cheraw kan te, Mizo thawnthu lemchan te an entir a, Mizo thawnthu lemchan ah hian Mauruangi, Chhurbura, Mualzavata, Chawngchilhi, Chawngtinleri, Pawngvina, Lalruanga leh Keichala te bakah thawnthu lar dangte lemchana entir a ni. Heng bakah hian Lalnu Ropuiliana, Lal Bengkhuaia te chanchin lemchana pholan a ni tel bawk. Mizo infiamna leh Chheih lam intihsiakna lawmman sem a ni a. 

Mizo infiamna chi hrang hrang 12 ah sikul naupangte tan inelna siam niin Middle School Section ah Govt. Chanmari Middle School leh High School Section ah Govt. Chaltlang High School te chu Overall Champion an ni a. Chheih Lam intihsiaknaah Middle School Section ah 1-na Govt. Chhinga Veng M/S; 2-na Govt. Venghlui M/S leh 3-na Govt. Chanmari M/S te an ni a. High School Section ah 1-na Govt. Mizo H/S; 2-na Govt. Chaltlang H/S leh 3-na Calvary H/S TNT te an ni a. 

Lammualah hian nimin atangin Pawl Kut hi hman tan niin naupangte te Mizo infiamna hrang hrang an hmelhriat nan hengte hi pholan a nih bakah naupangte tan intihhlimna leh infiamna chi hrang hrang chhawpchhuah a ni bawk. Pawl Kut 2023 hi Social Welfare & Tribal Affairs Department in Ministry of Tribal Affairs atana sumpai tanpuina an dawn kaltlangin an buatsaih a ni.