3320/2022-2023

Kolasib dated 21st January 2023: Vawiin chawhnu khan Pu K.Lalrinliana, Minister, Food, Civil Supplies & Consumer Affairs Department, Kolasib Assembly Constituency bialtu MLA ni bawk chuan Rural Development Department leh MLA-LADS hmang a sak, Project Veng Futsal Ground hawngin MLA Cup 2023 Kolasib District Open Futsal Tournament a hawng nghal bawk a. Pu John LT Sanga, Deputy Commissioner chuan khual zahawm niin a tel pui a, Pu Lallawmsanga Ngente, President, Village Council, Project vengin hun a kaihruai a ni.

Minister Pu K.Lalrinliana chuan Kolasib țhalaiten infiamna kawng ah hmasawnna an neih theih nan tun hma atang tawhin Venglai Sports Promotion Committee chuan ruahmanna hrang hrang a siam țhin thu te, Project Veng YMA ram chu Basketball leh Volleyball Court sakna atan ruahmanna hmasa neih a lo nih țhin dan te sawiin MLA-LADS leh Rural Development Minister țhahnemngaihna bak ah Project veng khawtlang hruaitute inpekna zarah, remchan zawkna avangin Futsal Ground sak chu hlawhtling tak a puitlin a nih thu a sawi a. Kolasib țhalaite tan a infiamna kawng a hmasawnna leh hriselna thlentu hmanraw țangkai a nih theihna turin duhsakna a hlan a, changtlung zawk a chei chhunzawm a nih theih nan ruahmanna siam a nih tur thu a sawi.

Pu K.Lalrinliana chuan hmasawnna hna chak zawk a kalpui tur chuan ruahmanna felfai siam hmasak a țul thu sawiin Kolasib Town Master Plan te duan țhin a nih thu a sawi a. Project vengah FastTrack Court, Judicial Quarter sak kalpui mek a nih bak ah Basketball Court leh Sawrkar hmun pawimawh sakna turin ruahmanna a awm thu a sawi. Khawtlang hmunhma leh thil neih hrang hrang hlut thiam apiang chu khawtlang nuam leh changkang a nih țhin thu Supply Minister chuan sawiin Project Veng Futsal Ground chu neitu nihna thinlung nen uluk tak a enkawl turin kalkhawmte a chah bawk a ni.

Pu John LT Sanga, Deputy Commissioner chuan Mizoram chu tlang ram a nih angin veng hrang hrang ah ram leilungin a zir loh avangin Football Field puitling siam a rem țhin loh thu a sawi a. Heng harsatna hi Futsal infiamna intihhmuhna hian hmun tam tak ah țhalaite tan infiamna hmun a hawn sak mek thu sawiin Project Veng Futsal Ground pawh hian Kolasib țhalai tam zawk te tan infiamna kawng a hmasawnna a tlen ngei a beisei thu a sawi.

Pu Lalthianghlima, Vice President, Project Veng branch YMA tarlan danin Project Veng Futsal ground hi MLA-LADS atanga Cheng Nuai 12 leh DRDO hmalakna atanga sak niin YMA hnatlang țum 20 vel neih a ni a. MLA CUP 2023 Kolasib District Open Futsal Tournament ah hian kum 40 hnuai lam team 40 leh kum 40 chung lam team 5 inkhel turin an inziak lut a ni. Minsiter Pu K.Lalrinliana chuan Mizoram Premier League khel tur Project Veng Football Club te hak tur Jersey a hlan bawk a ni.


Attachment

  • Loading attachment...