No.4092/2020-2021

Siaha; August ni 13: Vawiin chawhnu khan Health Minister Dr.R.Lalthangliana chuan Siaha Medical Department tlawhin; Nursing School te, DMS office sak mek te, Staff's quarters sak lai mek te leh District Hospital building thar te a tlawh. Minister hi CMO Dr. C. Hnichho leh DMS Dr. C. Lalrosanga te bakah MO leh staff dang ten an lo dawngsawng a ni.

Minister chuan Medical dept. a tlawhna-ah thu sawiin; Covid-19 dona kawnga Mizoram state chu India rama thawk tha ber kan ni. Kan hmalakna dan chungchang te pawh Central atangin min lo zawt thin a ni. Hei hi Pathian tanpuina leh Mizoram mipui ten Covid-19 dona kawnga kan inlungrualna leh thawhhona that vang a ni, a ti. Minister chuan Siaha Medical dept pawh inthawkrim hle a, inhnathawh that thawm te pawh kan lo hre thin a, kan chhuang che u in, kan lawm hle a ni, a ti.

Minister chuan Mizoram sawrkar in Medical dept. staff indaihlohna hi a ngai pawimawh hle a, indaihloh zualna phuhruk turin IV Grade atanga MO thlenga huamin staff 734 lak a tuma, Covid-19 boruak avangin staff lak hna hi kan la kalpui theih rih lo a ni, a ti.

Minister chuan Mizoram state-a Covid-19 +ve zawng zawng hi 600 chuang kan ni tawh a, Central lama mithiam te chuan tun ang rate a kan kal chuan December thla-ah chuan 5000 chuang pawh kan ni thut thei a ni, an ti a. Chuvangin sawrkarin covid-19 laka kan him nana inkaihruaina a duan te zawm that hi mitin ten kan tih makmawh a ni a, tumah kan inthlahdah thiang lo a ni, a ti bawk.

Pu H. Lalengmawia, Secretary H&FW pawhin thu sawiin Siaha medical staff ten Covid-19 dona kawnga an hnathawh that avangin lawmthu hrilh hlawmin, Sawrkar hna eng ang pawh thawk i la, kan hna thawhna zawn theuhva Role model nih kan tum tur a ni. Doctor pawhin Doctor nih awmreng mawia a awm tur a ni a, medical staff dang te pawhin medical staff ni awmrenga mawia in awm tur a ni, tiin duhsakna thu hlan pahin fuihna thu tha tak a sawi bawk.

Minister hian Medical dept. a tlawhzawhah Gov't Saiha college a tlawh nghal bawk a. College a tlawhna-ah thu sawiin Minister chuan Covid-19 avangin kan buai hle a,admission lak chungchangah pawh harsatna a awm avangin atam thei ang ber mahni district-ah theuh admission hi lak nise kan ti a.Mark hniam leh sang pawh admit vek mai tur a ni.Teacher in daihlohna vangin lump sum pay teacher 100 tal lak kan tum a ni,a ti bawk. GSC puipa ten College mamawh leh harsatna an lo thlen te chu a theih ang anga a enpui tur thu a sawi bawk.

Minister hi Pu H. Lalengmawia,Secretary H&FW, Pi Lalhmangaihi,Director,DHME leh Official thenkhatin Aizawl atangin an lo tawiawm a ni.   Minister hian Independence Day-2020 lawmna-a khuallian ni turin  naktuk khian Lawngtlai a pan ang.