No.4093/2020-2021

Kan hma lawka Village Council inthlan neih tur chungchanga YMA nen hmalak ho dan tur chungchang sawiho turin vawiin khan Lunglei DC leh District Election Officer ni bawk Pu V Lalsangliana kaihhruaiin a Office Chamber-ah meeting neih a ni. Meeting ah hian Lunglei SP Pu Stephen Lalrinawma, CMO Dr Lalthlamuana, Addl DC Pu R.Vanrengpuia leh election kaihhnawih official-te leh Sub Hqrs YMA Lunglei hruaitute an tel a ni.

Lunglei DC Pu V Lalsangliana chuan State Election Commission thuchhuah dated 05/08/2020 angin Mizoram chhungah Village Council election neih tur anih angin Lunglei District-ah pawh Village Council 113-te tan inthlanpui vawi 20-na tur chu ni 27th August, 2020 (Ningani) hian buatsaih ani dawn a ni, a ti a. Lunglei District chhungah VC inthlan muanawm leh felfai tak neih anih theihnan Sub Hqrs YMA Lunglei hruaitute chu hmalak pui leh thawhho puiah a sawm a ni.

Meeting-ah hian SEC thuchhuah Village Council leh Local Council inthlanpui chhunga inkaihhruaina SOP te zir ho a ni a. SEC thuchhuah chuan VC Election Poll Day-ah hian COVID-19 hrileng avangin physical distancing, mask vuah, hand sanitizer hman te uluk taka zawm tur a ni, a ti a. Polling Station leh a chhehvelah engtiklai pawhin Physical Distancing (6 feet) zawm reng tur niin tum khat ah mi 50 aia tam punkhawm loh tur a ni a, mei zuk leh phone hman khap tlat a ni bawk. Heng inkaihhruaina te hi mipuiten tha taka an zawm theih nan Poll Day (27/08/2020)-ah polling station tinah YMA duty tur ruat ni se tih Committee chuan a rel a. Sub Hqrs YMA Lunglei hruaitute hian he rawtna hi pawmin duty tur anlo in ruat fel tur thu DC hnenah hian a thlen a ni. Polling station-ah te hian a tul angin security leh medical-te pawh an duty dawn a ni.