21/2022-2023

Dated Serchhip, the 2^nd April, 2022: Vawiin khan Dr. Renu Sharma, IAS, Chief   Secretary to the Government of Mizoram chuan Serchhip tlawhin Serchhip a Head of Offices te nen DC Conference Hall ah inkawm hona a neih bakah, Govt. Serchhip College te, Serchhip District Hospital te leh District Agriculture hmunhmate a tlawh.

Zing lamah tun hnaia NAAC Accreditation Grade A hmu thar Government Serchhip College a tlawha, an hmunhmate fangin Principal Pu Lalremsiama leh thawktu dangte nen inkawm hona hun an hmang a. Hemi hnu hian DC Conference Hall ah Serchhip Head of Offices te nen inkawm hona an nei zui a ni. He inkawm honaah hian Dr. Renu Sharma chuan, Serchhip district in hmasawnna duhawm tak tak a neihte chu lawmawm a tih thu sawiin, officer kalkhawmte chu an hna theuhvah theihtawp chhuah zel turin a hrilh a. Fur a lo hnai leh tawha fur lo thlen hmaa inbuatsaih lawk ngaihna chiah te pawh inpuahchah tha turin a chah a ni. Covid19 hripuiin min la kiansan lo tih hriaa, Covid19 laka himna dan (CAB) te tha taka zawm thin tura mipuite kawhhmuhtu ni tur leh entawn tlaka awm turin officer te chu a chah a, zirna inte pawh kal tan leh tur anih avangin zirna in te pawhin tha takin CAB in lo zawm dawn nia tiin a chah a ni. Officer kalkhawmte chu an hmalakna hrang hrangte zawtin harsatna an neihte chu DC hrilh hriaa, DC kaltlanga a tul ang  zela inhriattir tawna, a umzui pui thin tur thu a hrilh a ni.

He hun Pu Lalmuansanga Ralte, Addl. DC kaihhruaiah hian Serchhip Bawrhsap Pi Nazuk Kumar, IAS chuan Serchhip District dinhmun tlangpui leh district chhunga sawrkar hmalakna langsar zualte report a pe a ni. He hunah hian Pu Stephen Lalrinawma, SP leh Officer dangte an kal tha hle a ni.

Head of Offices te nen inkawmna an neih zawh hian Serchhip District Hospital a tlawh leha, PSA Oxygen Plant leh Hospital hmunhmate a tlawh kual a. PGCIL CSR hmanga Serchhip District Hospital thar sak tura ruahmanna awm mek chu chak taka bawhzuia, a hma thei ang bera a sak hna tan an tum tur thu thawktute hi a hrilh a ni.

Damdawiin a tlawh hnu hian District Agriculture Office tlawhin, Composite Mini Feed Mill te, Mini Oil Expeller te, Mini Dal Mill te a tlawh bakah DAO Committee Room ah thawktute nena inkawm hona tawi neiin he hunah hian Pu Tlangtimawia Zote, DAO chuan an hmalakna langsar zualte report a pe a ni. 

Chief Secretary hian tlai lamah Aizawl a pan lehnghal a ni.