20/2022-2023
Siaha, the 2nd April, 2022: Siaha bialtu MLA leh Minister of State ni bawk Dr. K. Beichhua chuan vawiin khan Siaha khawpui chhunga kawngpui zim deuh lai tihzau dan tur Siaha PWD Engineer te nen an en.

Siaha khawpui kawngpui tihzauna leh Siaha to Titlao via Thosai atan PWD Minister, Chief Minister Pu Zoramthanga chuan Cheng vaibelchhe 10 pek a remtih thu Dr. K. Beichhua chuan a sawi a, lawmawm a tih thu a sawi bawk.

Siaha Meisatla to Circuit House via Siaha Bazar kawng zim deuh lai an khawih tur thui zawng hi ruahmanna ang chuan kilometre 3.33-a thui a ni a, a tlangpuiin 1.5 metre vela tihzau tum a ni. Hei bakah hian Assam Rifles road to Siahahtlah kawngpui zim lai tihzau tum a ni bawk a, tihzau tur chin thui zawng hi ruahmanna ang chuan kilometre 1.6-a thui a ni.

Siaha bialtu MLA, Dr. Beichhua chuan vawiin khan Meisatla to Titlao via Thosai kawngpui tihzau tur pawh a en nghal bawk. He kawng hi kilometre 7-a thui niin, metre 3.75 metres Plain Cement Concrete pavement-a siam tura ruahman a ni bawk.

Dr Beichhua chuan kawngpui tihzau turah hian Circuit House penga ama mimal ram pawh an duh chin la hek turin PWD official te hnenah a lo hrilh tawh a, mimal ram lak ngai a awm chuan an Village Council hruaitute nen ruahmanna lo siam turin a hrilh nghal bawk a ni.

Siaha tui lakna Renewal & Augmentation of Siaha Water Supply Scheme, Titlao a hmunah a tlawh bawk. He scheme hi kawlphetha hmanga Siaha khawpui chawm tur Titlao lui tui pump na leh sawngbawlna hmun a ni. Dr. Beichhua chuan tun dinhmunah Titlao tui pump leh Gravity a tui lakna tui hnaia an hawn tak nen tangkawpin Siaha khawpui mamawh water supply chu tha tawka a hriat thu leh tui connection pawh Siaha khawpuiah a duh apiang an pekchhuah theih tawh thu a sawi bawk.