Nimin khan Health & Family Welfare, Commerce
& Industries leh Higher & Technical Department changtu Minister
Dr R.Lalthangliana chuan Champhai leh Khawzawl District-a department a
enkawl hrang hrangte tlawhin a enfiah.
Minister hian tukin khan Zokhawthara Land
Custom Station leh Health Sub Centre-te tlawhin khawtlang hruaitute a kawm a.
Myanmar ramri depa awm sumdawnna hmunpui Zokhawthar chu a awmna avangin
khaw pawimawh tak ani a, sumdawnna mumal zawk awm theihna tura buaipui a ni, a
ti a. Land Custom Station chu tichangtlunga Integrated Check Post a hlankai tum
ani a, hemi tur hian Central lam hotute pawh State Official-te nen a hmunhmate
tlawha zirchiang tura a ngen tawh thu a sawi a. Hemi
mai bakah hian Mizoram chhim lamahte Indo-Mynamar mai bakah Indo-Bangladesh
nena insumdawntawnna tichangtlung thei tura ngaihtuahna sen
zel ani, a ti bawk. Zokhawthar khawtlang hruaitute’n mamawh an thlente a
tul anga lo enpui a tum thu a sawi bawk.
Minister tawiawmtu Dr. ZR Thiamsanga, MLA,
Vice Chairman, Health & Family Welfare Board pawhin thusawiin,
Zokhawthar chu ramri depa awm district leh State tana pur chawluhna
pawimawh tak anih avangin ngaihpawimawh a tul thu a sawi a. Hriselna lam kawnga
hmasawnna ruhrel siam a tul thu a sawi bawk.
Pu J.Hmingthanmawia Director, Commerce and
Industries pawhin thusawiin, Zokhawthar leh ral leh lam Khawmawi, Myanmar
inkalpawhna lei dawh tur DPR Mizoram PWD in an peihfel tawh thu sawiin,
Immigration Check Post pawh tun atanga hun rei loteah peihfel tum a ni, a ti a.
Ramri kaltlanga insumdawntawnna chu Sawrkar laipui khawih anih thu leh State
sawrkar hna chu hmunhma siam leh hmanraw mamawhte lo chhawpchhuahsaka a theihna
ang zeal lo tawiawm anih thu a sawi a. Zokhawthar chu Sawrkarin a
ngaipawimawha ngun takin a vil mek zel a ni, a ti bawk.
Minister Dr. R.Lalthangliana hian Government
Champhai College, District Industry Complex, Khawzawl Damdawi In leh Government
Khawzawl College-te a tlawh bawk a. Hmunhmate a enfiah hnuah thawktute nen
inkawmna neiin, mamawh an thlente a tul anga lo bawhzui
a tum thu a sawi a ni.
Minister hi Pu C. Ramhluna, Vice Chairman, Industrial Development Board; Dr T.Lalhmangaihi, Director, DHME; Health, Commerce & Industries leh Higher & Technical official-te bakah District Official ten an tawiawm a ni.
