971/2022-2023
Lunglei the 21st, June' 2022 : H&FW Minister Dr R Lalthangliana chuan vawiin khan District Hospital, Hnahthialah thisen dah thatna (Blood Storage Centre) leh nausen piang hlim damlo enkawlna (New Born Stabilization Unit) te a hawng.

Hawnna inkhawm Dr T. Lalhmangaihi, Principal Director, H&W Department kaihhruaiah H&FW Minister Dr R. Lalthangliana chuan Mizoram puma H&FW Department tih changtlun leh a kaihhnawih ruhrel te ruahmanna kawnga hmalakna kal mekah District Hospital, Hnahthial pawh tih hmasawn zel niin Hnahthial District mipuite mamawh em em thisen dah thatna (Blood Storage Centre) leh nausen piang hlim damlo enkawlna (New Born Stabilization Unit) te chu tangkai taka hman an nih a, hriselna tha zawk leh damna an thlen ngei a beisei thu a sawi a. Hnahthial Hospital-ah CMO office sak mek anih bakah medical test hrang hrang tih theihna tur Integrated Laboratory ruahman tum anih thu a sawi a. World Bank kaltlangin Strengthening of Health System in Mizoram Project hnuaiah cheng vaibelchhe 280 sengin Mizoram puma health infrastructure tih changtlun hmalakna nikum atanga bultan niin chak taka kalpui mek anih thu a sawi bawk.

Hnahthial DC Pu R. Lalremsanga pawhin thu sawiin Hnahthial District Hospital tih changtlun zel nan mipui mamawh em en khawl thar leh unit thar te ruahman anih chu hmasawnna rahbi pawimawh tak a ni tiin hemi ti hlawhtling tura theihtawp chhuaha hma la tu H&FW Minister Dr R. Lalthangliana leh Department hotute chungah lawmthu a sawi a. Covid-19 hrilengin hun rei tak harsatna nasa tak a thlen karah heng hmasawnna te kan hmu thei hi kan vannei takzet a ni tiin Hnahthial District Hospital doctor leh staff zawng zawngte thawhrimna leh inpekna avangin an chungah lawmthu a sawi a ni.

Thisen dah thatna (Blood Storage Centre) ah hian Blood Refrigerator leh centrifuge te dah a ni a. Hnahthial District a thisen pek te dah that tura Lunglei a thawn thin chu he Blood Storage Centre ah hian dah that theih ani tawh dawn a.He centre hi tih changtlun zela Hnahthial District Blood Bank tur atana hmalak chhoh zel tum a ni. Nausen piang hlim damlo enkawlna (New Born Stabilization Unit) ah hian radiant warmer leh phototherapy unit te awmin he centre a thawk tur nurse tih fel tawh a ni bawk.

Hawnna inkhawm, District Hospital Hnahthial new building- a neihah hian H&FW Principal Director Dr T. Lalhmangaihi, Director Health Services Dr C. Lalzepuii, Director, H&ME Dr KK Chhetri, Hnahthial DC Pu R. Lalremsanga, Hnahthial SP Pu Lalbiakkila Tlau leh District official dangte, khawtlang hruaitute leh party hruaitute an tel a ni.

H&FW Minister hian Hnahthial Middle School, Bazar Veng pawh tlawh nghalin Headmaster Pu H Lalthanzuala leh a thawhpuiten lo dawngsawngin school building sak that dan tur leh a hmunhma chei that dan tur leh school mamawhte an sawiho a ni.