970/2022-2023
Lunglei the 21st, June' 2022 : Zan hnih riaka Mizoram rawn zin North Eastern Council (NEC) Secretary Pu K. Moses Chalai, IAS chuan nizan khan Lunglei a rawn thleng a ni.

NEC Secretary hi NEC Adviser (Banking & Industries) Pi R.Lalrodingi'n rawn tawiawmin Lunglei Circuit House ah Lunglei HPC Vice Chairman Pu Lawmawma Tochhawng, Bamboo Development Board Vice Chairman Dr K Pachhunga, Lunglei DC Pu Kulothungan A leh official leh party hruaituten anlo dawngsawng a ni.

Circuit House-a inkawmna hun hmanah Lunglei HPC Vice Chairman Pu Lawmawma Tochhawng chuan NEC kaltlangin Mizoramah hmasawnna ruhrel leh ei leh bar intodelhna tura hmalakna hrang hrang kalpui tawh leh kalpui mekte avangin NEC hotute hnenah lawmthu a sawi a. Lunglei District ah pawh NEC kaltlangin Lunglei Supermarket, Digital planetarium, backward area development fund te kalpui mek niin Lunglei District atangin project thehluh mek leh thehluh belh zel tum mekte - multilevel parking tur, municipal building, hatchery for fisheries, RD hnuaia livelihood project leh hmeichhiate hmasawnna tur (women upliftment) te pawh lo pawma, lo ti hlawhtling ngei turin NEC Secretary chu a ngen a ni.

North Eastern Council (NEC) Secretary Pu K. Moses Chalai chuan Lunglei District hotuten tha taka anlo dawnsawn avangin an chungah lawmthu a sawi a. Economy leh ei leh bar kawngah Mizoram chuan kum reiloteah hmasawnna nasa tak hmu in hmachhawp tam tak pawh ala awm a, hmasawnna tluang taka a kal zel theihnan leh NEC chuan Mizoram mamawh tak project te a tih hlawhtlin theihnan a hmun ngeia rawn tlawh kual anih thu a sawi a. NEC kaltlangin hmarchhak state pariatah tanpuina rualkhai taka sem zel tum anih thu sawiin Mizoram atanga project tha tak tak thehluh a ni thin chu lawmawm a ti a, Mizoram sawrkar hnuaia official-te NEC nena thawhhona ah an inpe in thawk tha a tih thu a sawi bawk a ni.

Tukin khan NEC Secretary Pu K. Moses Chalai chuan NEC sum Rs 14.03 crores seng a sak tur Lunglei Super Market hmunhma a tlawh a, Super Market hi chhawng 4 a sak tur niin basement chhawng 3 leh ground floor chu motor parking tura tih a ni. NEC Secretary hian Digital Planetarium, Zohnuai a sak mek a tlawh bawk. NEC Secretary hi NEC Adviser Pi R. Lalrodingi, Lunglei Bawrhsap Pu Kulothungan A leh official ten an tawiawm a ni.

NEC Secretary leh amah zuitute hian vawiin hian Thenzawl an tlawh hnu ah Kolasib ah an riak anga, nilaini zingah Bukvannei oil palm factory an tlawh hnuah Silchar panin an haw leh dawn a ni.