Vawiin khan Higher & Technical Education Minister Dr.R.Lalthangliana chuan ICFAI University, Mizoram 8th Convocation hmanpuiin, Khuallian a ni.

Khuallian Dr.R.Lalthangliana chuan ICFAI University, Mizoram atanga Under Graduate leh Post Graduate Degree nei thar zawng zawng hnenah duhsakna leh lawmpuina a hlan a, Khuallian anga sawm a nih chu lawm awm a ti bawk a ni. Khuallian Dr.R.Lalthangliana chuan mithiam tan hnathawh tur a la tam a, mi invawng leh taima tan hlawhtlinnna hi engkimah a awm a, inelna pawh a sang zel a, mi aia thiam ni zel turin zirlaite a chah a ni. Minister chuan Sawrkar hna ngawr ngawra innghat lo a, mahni kut ke a eizawnna, Entrepreneurship leh Skill Development lama tan la a, ngaihtuahna leh hmalakna nei turin zirlai te chu a ngen a. Minister Dr. R. Lalthangliana chuan ICFAI University chu Mizoram a private university hmasa ber niin, harsatna tam tak a tawh pawh Sawrkar chuan a hriatpui a ni, a ti a. Minister chuan zilaite'n tan la a, theihtawp an chhuah chhung chuan midangte kalna tur atana University chhuanawm a ni zel thei a ni, a ti bawk a ni.

ICFAI University, Mizoram 8th Convocation ah hian Master of Social Work Zirlai 34, MA Education Zirlai 15, MBA Zirlai 3, MA (Political Science) Zirlai 35, MA (English) Zirlai 15, M.Com Zirlai 9, MSc (Geography) Zirlai 16 leh Undergraduate Zirlai tha hnem tak hnenah Certificate hlan an ni.

ICFAI University, Mizoram 8th Convocation ah hian ICFAI Chancellor Prof. J.P. Ramappa, Higher & Education Secretary Pu Lalbiaktluanga leh midangte an tel a ni.