No.7784/2020-2021

Lunglei 13th March 2021 : Health & Family Welfare Minister Dr. R. Lalthangliana chuan tukin zing khan Lunglei Civil Hospital tlawhin cheng nuai 380 chuang senga sak mek Trauma Centre leh RT-PCR Laboratory sakna tur a enfiah.

Health Minister hi Lunglei Civil Hospital Medical Superintendent Dr. SR. Ngurchamliana leh a thawhpui ten an lo dawngsawng a, Trauma Centre sak mek chu tlawh kualin thawktute harsatna leh hna a chak theih lohna chhan te a enfiah a, Trauma Centre sak hna thawktute chuan hnathawh chak theih lohna chhan ber chu tui harsat vang a nih thu Minister hnenah hian an sawi a, thil dangah chuan harsatna lian an neih loh thu an thlen a ni. Dr. R. Lalthangliana chuan Trauma Centre chu District thar 3 tih lohah chuan sak kal mek vek a nih thu a sawi. Trauma Centre chu hliam na zual leh chetsualna lian thama rang taka inenkawlna hmun tur a nih thu sawiin ICU khum pawh 5 keng tel nghal tur a nih thu a sawi a ni.

Hetih rual hian Lunglei Civil Hospital-a RT-PCR Laboratory, cheng nuai 140 senga sak tur hmun hma Minister hian en nghalin sum harsat avanga hma lak zung zung a harsat thu a sawi a, hei bakah hian thawktu engemaw zat lak thar a ngaih dawn avanga hma lak chak a harsat thu sawi bawkin a theih anga ranga bawhzui mek a nih thu a sawi bawk. Hei bakah hian Minister Dr. R Lalthangliana chuan Lunglei Civi Hospital building chu a chul tawh avangin a hma thei ang bera rawng hnawih that a nih tur thu a sawi nghal a ni.

Lunglei Civil Hospital a tlawhnaah hian Doctor's Recreation Hall-a hun tawi hmanah Minister chuan Covid 19 dona kawngah Mizoram chu India ramah a thawk tha ber a nih thu sawi langin Hriselna kawnga thawktute leh VLTF hmalakna fakawm a tih thu a sawi a, Lunglei District hmasawnna tur khawthlang lama Bangladesh leh India insumdawn tawnna hna chu ngawrh taka bawhzui a nih thu leh Bangladesh sawrkar hruaitute nen pawh an indawr reng thu a sawi a, Border Trade hmunpui tur Kawrpuichhuah leh hmun dangte chu a hmunah kala reiloteah a hmunah enfiah leh a tum thu sawiin Bangladesh sawrkar hruaitute nen pawh hmai chhanah an inbiak dawn thu a sawi a, kum 2023 chuan Bangladesh nena insumdawn tawnna hi bul tan thei ngei tura hma an lak mek thu a sawi lang bawk a ni.  

Minister hian Kendriya Vidhyalaya School, Ramthar veng ami a hmunhma leh  MAMCO kaltlang a School building sak hna thawh mek a tlawh a, hmalakna leh hmachhawp te a hmunah a en nghal bawk a ni. Dr.R. Lalthangliana chuan Kendriya Vidyalaya School chu chak taka hma la turin Central Sorkar ah thlen a tum thu a sawi a, School Principal leh thawktu dang te chu kawng tin renga School tan tha taka hma la a enkawl tura a duh thu sawiin zirlai te chu zirna mai bakah hmasawnna hrang hrang  zirtir turin a chah bawk. Tun dinhmunah Kendriya Vidhalaya School-ah hian zirlai 239 awmin, Principal leh zirtirtu nghet 15 leh contract zirtirtu 3 awm mekin a School building thar sak hna hi SR Construction ten an thawk mek a ni.

Minister hi Lunglei DC Pu Kulothungan A, IAS, Official, Party hruaitu te leh Media ten an tawiawm a ni.