No.7785/2020-2021

Dated Serchhip, the 13th March, 2021: Vawiin hian Pu K. Lalrinliana, Minister, Fisheries, LAD, Food & Civil Supply,etc., chuan Pradhan Mantri Matsya Sampada Yojana (PMMSY) hmanga Sangha pui dahkhawmna leh siam chhuahna (Fresh Water Fish Brood Bank), Thenzawl Fish Farm a siamna tur hmun a tlawh a, hmalak dan tur a enpui.

Minister hian he Brood Bank siamna tur atana Department ruahmanna te enin a hmunhmate a fang a. Tui hnianghnar a awm theih leh theih loh te, ni a hmuh that dan turte, tui a thianghlim leh thianghlim loh te uluk takin a enpui a ni. A fur a thala tui hnianghnarna hmunah ngei hetiang brood bank hi dah a tul avangin engkim uluk taka atir atanga kalpui a ngaia, tha taka a puitlin ngei theih nan theihtawp kan chhuah tlan a tul a ni tiin thawktute chu a chah a ni. Pu K. Lalrinliana hian Brood Bank siam ruala construction dang awm turte kalpuina tur hmun te pawh thlir puiin a tul anga la enpui chhoh zel a tum thu a hrilh a ni.

Thenzawl Fish Farm ah hian Pradhan Mantri Matsya Sampada Yojana sum Rs. 415.60 lakh sengin 50,000 sqmtrs a zau Sangha pui, no hring tur vulhna hmun tur dil siam tura ruahmanna kalpui mek a ni a. Sum hi Central sawrkarin Administrative Approval a pe fel tawh a sanction hmuh thuai beisei a ni.

Minister hi Pu ZR Thiamsanga, MLA, Vice Chairman Health & Family Welfare Board leh Dr. Vanlaltanpuia MLA, Chairman, MYC ten an tawiawm a, Pu Amol Srivastava, IAS, SDO, Thenzawl, Pu F. Vanlallawma, Director, Fisheries leh Pi Lucy Lalrinpuii, DFDO, Serchhip te, Pu C.  Zadailova, DCSO, Serchhip leh midangten an lo dawngsawng a ni.