Vawiin khan Higher & Education Minister Dr. R.Lalthangliana chuan Mualpui a Govt. Aizawl College Building sak mek chu tlawhin, Govt. Aizawl College Principal Prof. C.Sangluaii chuan a hmunah Minister hi a lo dawngsawng a ni.

Minister Dr. R.Lalthangliana chuan Govt. Aizawl College Building sak mek leh a campus chu a fang kual a, hmalakna hrang hrangte enin, a rang lama luah theih a nih nan hma nasa taka lak a nih tur thu a sawi a ni.

Govt. Aizawl College, Mualpui-ah hian Commerce Building leh Cafeteria sak zawh tawh a ni a, NLCPR atanga sum hmuh Rs 12 crore in Administration leh Academic Building sak mek a ni. Govt. Aizawl College, Mualpui-ah hian Commerce zirlai 500 vel leh Arts Subject zirlai 1000 chuang lut thei tura ruahmanna siam a ni.

Govt. Aizawl College-ah hian Arts Department 8 leh Commerce Department 1 awmin, Teaching Faculty 40 leh Non-teaching Staff 14 an thawk mek a, zirlai 1280 an awm mek bawk a ni. Govt. Aizawl College hi Mizorama Hindi Core Subject zirna awm chhun a ni a, Hindi Core zirna hi May, 2000 atangin kalpui a ni.