Kolasib District leh Hailakandi District (Assam) inkara thil kaplhung te sawi dun in nimin khan Bairabi PWD IB ah Kolasib DC Pu Zoengsanga leh Hailakandi DC Pi Keerthi Jalli  te chuan meeting an nei .

Thutkhawm ah hian Kolasib DC Pu Zoengsanga chuan Mizoram Sawrkar thu ken Zophai hmuna Masjid sak mek chungchang sawichhuakin hei hi Zophai hmuna Mizoram leh Assam lam ina kutthlak lo ve ve tura an inrem siamna (Status Quo) bawhchhiatna a nih thu a tarlang a, hei hi Mizoram Sawrkar chuan a ngaimawh hle ani tiin sak chhunzawm tawhlo tura hmalak nise tih a tarlang bawk a, masjid sak that chungchangah hian Mizoram Sawrkar leh Assam Sawrkar ten level sang zawkah inbiakna nei tura rawtna thlen nise tia pawm tlan ani a, Sawrkar pahnih te inbiakna neih hma chu masjid sak chhunzawm loh nise tin District pahnih te hrilh hre loin hmalakna engmah awm lo se, DC te chu thla thum hnuah meeting nei leh nise tih te rel ani.

Hemi bakah hian ramri hrula cheng mihring/mipuite chu boruak muanawm hnuaia chengho leh boruak thatak hnuaia thil kalpui a nih theih nan Coordination Committee (NGO te huam in) din nise tiin a rel a, Meeting zawh hian masjid chu DC pahnih leh committee member ten a hmunah enfiah bawk.

Thutkhawm ah hian ILP chungchang sawilan bawk niin Kolasib SP Pu Vanlalfaka Ralte chuan Assam atangin ILP neilo tam tak a ruk a rala Mizorama lut thin an awm fo thu a tarlang a, ILP neiloa luh chu dan kalh a nih mai bakah Mizoram Sawrkar chuan a ngaimawh hle a, khauh takin hma an lak chhunzawm zel dawn avangin Assam lam thuneitu te chuan mipuite hnenah a zau thei ang berin zirtirna/hrilhhriatna (awareness) pe thin se tha a tih thu a tarlang a, hemi bakah hian Zophai hmuna leilet nei te chu hun kal tawh ah Assam police lam atangin harsatna an tawk zeuh zeuh thin  a, tun hnuah hetiang thil hi a thlen tawhloh nan hma la turin hailakandi SP chu a sawipui bawk a ni.

Thutkhawm ah hian Kolasib leh Hailakandi District atangin District Magistrate bakah, SP, DFO, Settlement Officer te leh Magistrate leh SDPO te an tel a ni.