No.4145/2021-2022
Aizawl, the 1st March, 2022: Vawiin khan Commerce and Industries Minister Dr R.Lalthangliana chuan Millenium Centre Roof Top Exhibition Hall ah Mizoram Handloom & Handicrafts Development Corporation Ltd. (ZOHANDCO) buatsaih kar hnih awh tur State Handloom Expo. a hawng. Hawnna inkhawmah hian Industrial Development Board Vice Chairman Pu K.Laldawngliana MLA, leh KVI Board Chairman Pu Lalthanliana te pawh an tel a ni.

Dr R.Lalthangliana chuan puan tah leh thiam hnang deh lama eizawng tute fuihin teirei peih turin a chah a. Eng hna pawh thawk ila, hlawhtling tur chuan daihrei leh tlo a ngai a, handloom lama eizawngtute tan pawh hlawhtlinna tak tak chang thei tur chuan daih rei leh teirei peih a pawimawh a ni, a ti. Hripui leng vanga Mizoram inkharkhipin handloom-a eizawngtute a vawchhe nasa hle a, chutihrualin, kuminah nunphung pangngaiin kan nung leh tan ta a, puantaha eizawng te tan pawh kawl a eng leh tan ta, Minister chuan a ti a. Tualchhung market chauh ngaihtuah lova, state dang leh ram pawn thlenga thawnchhuah tlak quality tha siam turin a fuih a. Mizorama thilsiam chhuah te ram danga thawnchhuah dan tur SEDP Board pawhin a ngaihtuah mek tih sawiin handloom leh handicraft lama eizawngtute pawh an ngaihtuahna ti zau turin a fuih a ni. Dr R.Lalthangliana chuan sawrkar anga tih theih awm apiangah tlanchhiat an tum loh thu a sawi a. Handloom leh handicracft chu SEDP anga kalnat theihna kawng tur nia a hmuh thu sawiin sawrkarin theihtawp a chhuah dawn a, kuminah hian bung thar an kai theih ngei a beisei thu a sawi a ni.

Industrial Development Board Vice Chairman Pu K.Laldawngliana pawhin expo-a tel zawng zawng te leh hetiang lama eizawngtute fuihin tihtakzetna leh taimakna nei tlat turin a fuih a. Mizo hnam incheina chu Mizoram mipui hmel leh ziarang lan chhuahna pawimawh tak a ni tih sawiin an eizawnna kawngah tui tur leh Mizoram tana thil tangkai an thawk a ni tih hre chunga thahnemngai taka thawk turin a chah a ni.

ZOHANDCO Chairman Pu C.Lalrammawia chuan ZOHANDCO chungchang sawiin kum 1988 a din a nih thu leh kuthnathawktuten malsawmna an dawn theihna atana tanpui tura din a nih thu a sawi a. Aizawl tiamin District tinah State Handloom Expo neih a nih tawh thu te, Aizawl leh Lawngtlaiah National Handloom Expo buatsaih a nih thu te, Vendor Development Programme (VDP) leh Seminar pawh District pali-ah an neih tawh a nih thu te a sawi a. Kumin March thla chhung hian ZOHANDCO office hnuaiah emporium hawn a nih tur thu leh hetah hian Mizo kutchhuak thil hrang hrang zawrh chhuah a nih tur thu a sawi a ni.

Kar hnih awh tur he Handloom Expo. hi March ni 15-ah khar a ni dawn a. Mizo kutchhuak - puan, kawr, ipte, incheina chi hrang hrang leh thiam hnang deh lam hawi te pho chhuah a ni a. Stall 36 a siam a ni.

Vawiin programme hi ZOHANDCO Managing Director Pu Benjamin Lalzama’n a kaihruai a. ZOHANDCO Board of Director zinga mi Pi Laldampuii chuan lawmthu sawiin hun hnung a khar a ni.