5th NEC Dr. T.Ao Memorial North East Football Championship 2013-2014 chu nimin ni 15/2/2014 tlai dar 4:00 khan Lammual ah khelh a ni a, Final match hmuhnawm takah Mizoram chuan Meghalaya chu extra time zawha penalty petah 4-2 goal-a hnehin Champion no mawi an la.

Final Match hmanpuitu Home Minister Pu R.Lalzirliana chuan thu tawi sawiin Mizorama sports hmunhma, hmanrua leh ruhrel hmasawnna nasa tak avang leh Mizo football khel thiam tak tak an awm tak avanga All India Football Federation (AIFF) pawhin Mizoram chu hmelhriatin Football Tournament ropui tak tak pawh kan thlen theih phah a ni, a ti a. Sports infiamna chi hrang hrangte chu eizawnna tling a ni tiin infiamnaa hlawhtling tak tak tur chuan taihmakna, tumruhna, chhelna leh insumtheihna te a tul thu te a sawifiah bawk. Mizoram ah Football-in nasa taka hma a sawn theih nana hma la tu Mizoram Football Association (MFA) chungah pawh lawmthu a sawi bawk.

MFA President Pu Lal Thanzara MOS pawhin thu tawi sawiin ni 13.2.2014-a MFA-in Best Grassroots Development Programme lawmman a dawn Trophy a pholang bawk. 5th NEC Dr. T.Ao Memorial North East Football Championship 2013-2014 Final Match inkhel hi Sports Minister Pu Zodintluanga bakah Deputy Speaker, Parliamentary Secretaries, Government Deputy Chief Whip, MLA leh Officials thahnem takin an thlir bawk a ni.