Department of Agriculture (Crop Husbandry) buatsaih ni hnih awh Agriculture Exhibition chu vawiin khan Assembly House Annexe-ah tan a ni a. Exhibition hi Agriculture Minister Pu R. Lalzirliana’n zing dar 10:00 khan a hawng a, Lt. Col. Z.S. Zuala, Parliamentary Secretary, Agriculture chuan Minister hi a tawiawm.

Exhibition hawngtu Minister Pu Zira chuan ATMA hmalakna hnuaia thlai thar hmuhnawm tak tak leh line Department-te hmalakna mipui hmuh tura pho chhuah chu a zawngchhang thlak hle a, kum tin neih ni thei se tha a tih thu a sawi a. Loneituten an tangkaipui theih nan Officer-te nen inpawh taka hmalak chhunzawm zel ni se a duhthu sawiin thawktute pawh hlawhtlinna hmu ngei tura taima taka thawk turin a fuih a ni.

Chief Minister Charge la mektu Pu R.Lalzirliana chuan Agriculture Department-in nu leh pa chan changa hma a la hi a fakawm a, he Exhibition hian hmasawnna a tilang a, field-ah pawh a takin hmasawnna hi langchhuak zel se, hlawhtlinna nei tura mi taima hmasate thawhrimna chhawmnung zel turin loneitute leh thawktute a fuih a, hlawhtlinna hmu turin Sorkar pawhin theihtawp a chhuah zel ang a ti.

Exhibition-ah hian ATMA hmalakna hnuaia Department hrang hrang – Agriculture, Horticulture, Fisheries, Soil & Water Conservation, A.H. & Vety, Sericulture Department-te bakah KVK 7 hlawmkhawm leh CAU (KVK), Selesih ten Stall neiin thlai thar chi hrang hrang, thei rah chi hrang hrang, rubber tiak, Silk pangang leh Cocoon chi hrang hrang, sangha leh bawnghnute te bakah hmanraw chi hrang hrangte entir a ni a, hmalakna hrang hrang thlalak - Blow Up leh Banner te hmanga entir a ni bawk.

He Exhibition hi District hrang hrangten ATMA hnuaia an hmalakna inentirsiakna a ni a. Endiktu tura ruatten an endik hnuah Aizawl District chu Pakhatna niin Kolasib District Pahnihna an ni a, Lunglei District chuan Pathumna an hauh bawk. King of the Show atan Oil Palm rah bawr, Pu Sanglura, Zawlnuam, Mamit District ta chu thlan a ni a, Queen of the Show atan Sangha (Catla/Bau), Kg 11-a rit, kum 3-a upa, Pu Vanlalnghaka Sailo, Tuisenchhuah, Lunglei District ta chu thlan a ni bawk.

Lawmman hrang hrangte hi February ni 18, 2014 (Thawhlehni)-a Vanapa Hall-a State Level Farmers’ Meet 2014 neih turah sem tur a ni a. He hunah hian kum 2013 chhunga Tlangram lo leh Leileta buh thar tam te, Oil Palm thar tam leh Fu thar tam te hnenah lawmman pawisafai leh chawimawna hlan an ni ang.

Ni hnih awh tur he Agriculture Exhibition hi mipuiin an hlutin tlawhtu an thahnem hle.