Lunglei the 21st,Nov’2020: Vawiin chawhnu khan Dr. Vanlaltanpuia, MLA leh Chairman, Mizoram Youth Commission chuan a bialchhung Lunglei, Zotlang a hmasawnna hnathawh te a hmun ah a en. Dr. Vanlaltanpuia hi Zotlang khawtlang hruaitute, VC leh party mi ten an lo dawngsawng ani.

Kum 8 chhung Zotlang Higher Secondary School Lumsump Grand in Aid bakah mipui thawhkhawm a kal pui mek school building tur sak mek chu a hmun ah a en a ni. Dr Vanlaltanpuia chuan Mizoram Sorkar in School building thar tam tak sak tur  zing ah Zotlang Higher Secondary School building chu a tel ve a sawi a, School building te chu a thar hlak a sak tur ani rualin Zotlang HSS building sak tur eraw hi chu khawtlangin engemaw chen a ruhrel sak anih avangin Sorkar atanga her rem a tul avang a lo en anih thu a sawi a.  He building sak tur hi khawtlangin  tha an tih angin  drawing felfai tak a hnena an thehluh hi thuneitu sang zawk ah thlen  ani ang a ti. Khawtlangin theihtawp an chhuah tawh a, a bak erawh chu ama kut anih thu sawiin, khawtlangin ro tha tak an neih tur thu a sawi bawk a ni. 

Zotlang Higher Secondary School sak tur hi a dung 72 ft , a vang 27 ft, chhawng 3, class room 4, office bakah hall leh motor parking te siam ani ang. Zotlang HSS hi Zotlang High School hnuai ah class kalpui thin niin Principal leh zirtirtu 7 neiin kumtin result tha tak an nei thin a ni.

Dr. Vanlaltanpuia hian Zotlang VC te hmasawnna hnatawh thenkhat a hmun ah a en a, Zotlang Field leh a panna kawng ama MLA fund atanga siam te a en bawk. Dr. Vanlaltanpuia hian a bial chhung a damlo natna khirkhan tak tak vei engemaw zat Kanghmun, Haulawng leh Pukpui ami te chu kanna pawisa fai a pe bawk a ni.