948/2022-2023
Champhai, the 17th June, 2022: Mizoram Youth Commission (MYC) Chairman Dr. Vanlaltanpuia chuan vawiin chawhnu dar 2:00 khan MYC Coaching Centre pangana ni turin Champhai Nursing School Building-ah MYC Coaching Centre thar khuallian niin a hawng. He hun hi Health & Family Welfare Board Vice Chairman Dr. ZR Thiamsanga, Champhai North bialtu MLA chuan khualzahawm niin a telpui a ni.

Khuallian MYC Chairman Dr. Vanlaltanpuia chuan Champhaia MYC Coaching Centre hawn thar a ni chu lawmawm tiin, District mipuite a lawmpui thu a sawi a. Mizo hnam chhanna tura pawimawh tak zirna tihhmasawnna tur atan MYC Coaching Centre hawn a nih thu tarlangin, MYC hnuaia IAS full sponsorship leh Mega Hybrid IAS programme kalpui nan Sawrkarin budget-ah cheng vaibelchhe 2.6 lai a dah avangin Planning Department changtu Chief Minister chungah MYC tihhmasawnna tura a thahnemngaihnaah lawmthu a sawi a. MYC Coaching Centre-te chu remchan dan leh intawm theih dan turte chhutin hleibik nei lova din thin a ni, a ti a. Mizo thalaite India rama hna lak sang leh exam-ahte an tling thei ta meuh lo chu veiawm a tih thu sawiin, kan dinhmunte thlirin MYC chuan Super 40 program kalpui tura hun a hawn mek thu leh India rama Academy tha ber ber 3; Vajiram and Ravi, Vision IAS leh ALS te biakfela thawhhona neih a nih thu a sawi a, June ni 24 a exam turah mi 500 chuang an inziaklut chu lawmawm tiin, tun maiah hlawhtlinna hmu lo mah ila a hlawhtlin ngei theih nan tan kan lak tlan a tul a ni, a ti a. Heng bakah hian Mega Hybrid IAS Programme hnuaiah mi 100 tan Coaching Centre 4 ah MoU sign a nih tawh thu a tarlang bawk a, MYC Coaching Centre Champhai chu a tul ang zela tihchangtlun a nih dawn thu leh, nakum lamah VSAT facilities bunfela program lian zawk kalpui tum a nih tur thu a sawi bawk.

Khualzahawm Health & Family Welfare Board Vice Chairman Dr. ZR Thiamsanga Champhai North bialtu MLA ni bawk chuan Champhaiah zirna tihhmasawn a nih theih nan sawrkarin theihtawp a chhuah mek zel thu sawiin, MYC Coaching Centre din a nih theih nana MYC Chairman hmalakna fakawm a ti a. Hmasawn turin zirna a pawimawh hmasak thu leh hmasawnna tinreng zirnaah a innghah tlat thu sawiin, zirna chawinun leh kawngah hian kan thanharh a ngai a ni, a ti a. MYC Coaching Centre-a thawk tur mithiam zawkte zawn tum a nih thu sawiin, a hlawhtlin nan zirlaite, nu leh pa leh zirtirtute an pawimawh a ni, a ti a. Thawhhona tha tak hnuaiah Coaching Centre changtlung leh tha a awm ngei a beisei thu leh tangkai taka hman a nih a beisei thu a sawi bawk.

He hun hi District Bawrhsap Pu James Lalrinchhana chuan kaihruaiin kalkhawmte lawmna thu a sawi a. Rev. K. Lianmunga'n hunserh a hmanga, Pu H. Lalnunzuala, Under Secretary, MYC in technical report a pe a. MZP Hqrs.Champhai President Tv. Thangdeihmanga hnen atangin thusawi ngaihthlak a ni a. Pu Lalnunfela Chawngthu, SDO(S) in lawmthu sawiin hun a khar a ni.

MYC Coaching Centre Champhai atan Nursing School Building chhawng chung bera Room 3 hman lailawk a ni dawn a, Coordinator 1 lak tawh a ni a, Faculty 3; General Studies, English leh Mathematics zirtirtu lakna tur tender chhuah thuai tum niin, lak fel a nih hnuah coaching class kalpui tum a ni. MYC in a Coaching Centre 4-a Coaching programme a kalpui mek ang heng Staff Selection Commission hnuaia hna hrang hrang, State Combined Services MPSC, MSSSB hnuaia hna lak hrang hrang atan kalpui phawt a ni dawn a. MYC Coaching Centre-ah hian mimalin an din Coaching fee sang tak tak ang kha awm loin, 70% velin tihhniam a ni a, 30% vel hi chu zirlaiin an pek ve a ngai a dawn a ni. Zirlai khawsak harsa an awm a nih chuan ngaihhnathiamna a awm dawn a ni.

MYC chuan Mega Hybrid IAS programme kalpuiin ALS Coaching Academy-te nen thawkhoin tunah hian Aizawlah mi 60, Lungleiah 20 leh Kolasib leh Siaha Centre ah 10 ve ve, an vaiin mi 100, UPSC exam bei tura inbuatsaihna Coaching a pe mek a, tun dinhmunah class kal a laklawh tawh avang leh MoU hi heng centre 4 atan chauha ziah a nih rih avangin tuna Champhaia Coaching Centre hawn tharah erawh hi chuan session kal lai hi kalpui a ni rih dawn lo a ni.

April ni 1, 2016 khan Aizawlah MYC Coaching Centre hmasa ber din niin, a kum leh 2017 April ni 15 khan Lungleiah din a ni a. January ni 15, 2021 khan Kolasib ah din niin, January ni 21, 2021 khan Siahaah hawn a ni a. Vawiin Champhaia hawn hi MYC Coaching Centre pangana a ni a. MYC in Coaching Centre a din piah lamah hian Govt. Serchhip College a zirtirtute chuan thalaiten an mamawh leh an tana tul nia an hriat avangin MYC-nen tangkawpin an College hmunah Coaching Class an hawng bawk a, hetah hian MYC chuan sum leh pai engemawzahin a pui ve bawk a ni.

Vawiin tlai khan MYC Chairman Dr. Vanlaltanpuia, Health & Family Welfare Board Vice Chairman Dr. ZR Thiamsanga leh District Official dangte chuan Keilungliah tuikhuah leh Tlangsam Winery-te an tlawh bawk.