947/2022-2023
Lunglei the 17th June, 2022 : India ram zalenna kum 75-na lawmna Azadi Ka Amrit Mahotsav leh sawrkar laipui scheme Anna Yojana hmalakna kal zelah vawiin khan Lunglei S bialtu MLA leh Bamboo Development Board Vice Chairman ni bawk Dr K. Pachhunga chuan NABARD Warehousing Scheme kaltlanga Rs. 1,31,20,000/- (Cheng vaibelchhe khat nuai sawmthum pakhat leh sing hnih) senga sak Tawipui S Supply Centre a hawng.

Hawnna inkhawm ah hian a kaihhnawih sawrkar official-te leh party hruaitute bakah Tawipui S leh a chhehvel khawtlang hruaitute leh tlawmngai pawl hrang hrang aiawhte an tel a ni.

Hawnna inkhawm Pi C. Lalduhzuali, DCSO Lunglei kaihhruaiah bialtu MLA Dr K Pachhunga chuan Tawipui S Supply Centre thar changtlung tak ruahman a ni chu hmasawnna ropui tak a ni tiin Tawipui S leh a chhehvel khua hmasawn zelna kawngah nghawng tha tak a neih ngei a beisei thu a sawi. Covid-19 hrileng nghawng kal zelah hmasawnna hna thar tam thei rihlo mah se Lunglei S bial chhung khuate ti hmasawn turin sawrkar laipui leh Mizoram sawrkarah project hrang hrang buaipui mek niin mipui mamawh ruhrel te ruahman sak zel a tum thu a sawi a. Khaw hrang hrangah school repair hna leh solar energy lama hmalakna kalpui zel tum anih bakah Salem leh Lunglawn ah hockey field ruahman mek niin Theiriatah MYC Centre changtlung tak ruahman mek a ni a, Theiriat ah vek hian khum 50 awmna Ayush Hospital din turin Sawrkar laipui dawr mek niin a hmun tur pawh neih fel tawh anih thu a sawi a. Hmasawnna daih rei nei turin mipuiten taima leh rinawm taka sawrkar an tawiawma an finchhuah a tul takzet a ni tiin hmasawnna ruhrel thar Supply Centre pawh neitu rilru pu a duat taka lo enkawl chhunzawm turin mipuite a chah a ni.

Tawipui S Supply Centre hi NABARD Warehsousing Scheme kaltlanga Rs. 1,31,20,000/- (Cheng vaibelchhe khat nuai sawmthum pakhat leh sing hnih) senga sak a ni a. Babie Construction & Consultancy Services chuan 20/11/2020 ah sa tanin 25/10/2021 ah sak zawh a ni a. He Supply Centre chhungah hian Godown 200 MT leng leh 2BHK staff quarter pahnih a awm a. He Supply Centre atang hian retailer panga - Tawipui N I, Tawipui N II, Tawipui S I, Tawipui S II leh Mualcheng S te a pe chhuak dawn a ni.

Lunglei District Civil Supplies & Consumer Affairs Department hnuaiah tun dinhmunah Principal Distribution Centre pakhat Luangmualah leh Sub Distribution Centre pahnih - Hnahthial leh Tlabung awmin Supply Centre 10 a awm a ni.

Supply Centre hawn zawh hnu hian bialtu MLA Dr K Pachhunga chuan Tawipui S Bazar area a leimin leh lei tlahniam chu a hmunah tlawhin Tawipui S VCP Pu C. Vanlalruata leh SDC i/c DM&R Pu H. Lalramenga te nen helai hmuna hmalak dan tur te an rel hova, retaining wall siam thuai anih theihnan ruahmanna siam tum a ni.

Hemi bakah hian Tawipui PHC sak that mek pawh contractor leh Tawipui MO Dr C. Lalhlimpuii leh a thawhpuite nen tlawhin hmalakna kal zel an enfiah a. He PHC sak mek hi tha taka zawhfel anih theihnan an mamawhte leh thil pawimawh dangte a hnenah thlen thuai thin turin a chah a ni.