1370/2024-2025

Dated: Mamit the 30th of July, 2024: Vawiin khan Higher and Technical Education Minister, Dr Vanlalthlana chuan Govt Mamit College Freshers cum Graduation Day, 2024 chu Khuallian niin a hmanpui. He programme hi Chhim Veng YMA Hall, Mamit-ah buatsaih a ni.

He hunah hian Minister chuan Mamit chu mi taima leh mahni kuta din tum tia hriat an nih thu sawiin, hmasawnna lam pana theih tawpa bei zel turin a chah a. Mamit chu mi hrang hrang awm khawmna (cultural diversity) ni mahse inlungrual leh inngeih tlang taka an awm thei chu district dang aia an chungnunna a nih thu a sawi bawk. Dr Vanlalthlana chuan zirlai pass chhuakte hnenah chuan fuihna thu sawiin zirnain a tum ber chu mi laktlak chherchhuah a nih thu a sawi a, eng hna pawh thawk se tangkai leh rintlak taka thawk turin a fuih. Zirlai tharte chu lehkha chhiar tam tur leh zirlai kaihhnawih ngaithla nasa turin a chah bawk a, a taima apiangin hlawhtlinna an hnaih thu a sawi. 

Vawiin programme-ah hian Minister chuan Govt Mamit College-ah Geography Dept. hawn a nih theih nan hmalak a nih thu a sawi a. Tin, zirlaiten Hindi an thiam zawkna atana buatsaih Skill Enhancement course senso a tum sak tur thu a sawi bawk.

Graduation programme zawhah hian Minister chuan Govt Mamit College hmunhma te tlawhin, thawktute nen inkawm hona hun neih a ni a, college mamawh hrang hrang te an sawi ho.

Govt Mamit College hi 1983 khan din a ni a. Tun tum a pass percentage hi 73.30% niin, mi 29 an graduate a ni.