1371/2024-2025

Aizawl, 30.07.2024: Sorkar scheme hrang hrang kalpuinaa sum hman dan endik hna thawktu Social Audit Unit (S.A.U.), Mizoram buatsaihin DRDO Conference Hall, Aizawlah Mahatma Gandhi National Rural Employment Guarantee Scheme hnuaia social audit neih zawh tak thlirletna, Review Meeting neih a ni.

He review meeting hi S.A.U. Director, Pi C. Laltleipuii’n a kaihruai a, Pu Danny Lalchhuanawma, Under Secretary, Rural Development Department chuan a rawn telpui bawk a ni. Director chuan kalkhawmte lawmna thu sawi pahin social audit neih a tulna chhan leh a pawimawhna-te sawiin, Social Audit-in a tum ber chu Sawrkarin hmasawnna Scheme leh Programme a duan hrang hrangte’n thawh a tum ang taka sum leh pai lo kal chu thawh a ni reng em tih leh engtiang takin nge mipuiin an hlawkpui tih mipui (beneficiaries) leh a thawktu (Implementing Agency) bakah Sorkar hnathawk (Official) ten a hmun ngeia an endik a, thil felhlel awm te a tul ang a siamtha a hmalak ngaite bawhzui zel hi a ni tiin a sawi.

He hunah hian Mizoram chhunga District tin District Rural Development Officer (DRDO) leh Rural Development  Block hrang hrang atangin  Block Development Officers-te an kal khawm tha hle a; He meeting-ah hian June thla chhunga NREGS hnathawh endikna (social audit) neih tak a, hmuhchhuah hrang hrangte sawihona neih a ni a, Resource Person-te report atangin District leh Block hrang hranga hma lak chhunzawm turte leh bawhzui ngai, insiam that ngai, tul leh pawimawh tak tak awmte chu bawhzui zel dan tur sawiho a ni bawk.

MGNREG Act, 2005 Section 17-na leh MGNREG Audit of Scheme rules, 2011 in a phut angin Ministry of Rural Development, Government of India hnuaia Centrally Sponsored Scheme zawng zawngah chuan Gram Sabha hmanga social audit hi neih vek tura tih a ni a. Hmasawnna hnathawh hrang hrang leh Social Security Schemes hrang hrangah Social Audit Unit, Mizoram hian Sawrkarin a bituk ang zelin social audit hi a kalpui mek zel bawk a ni. Mizoram pumah MGNREGS atan hian vawi 3,500 vel social audit hi neih tawh a ni a. Kumin chhung hian Mizorama khua awm zawng zawngah social audit hi neih chhuah vek tuma hmalak mek a ni bawk.