1372/2024-2025

Dated Lawngtlai, 30th July, 2024: Vawiin khan Lawngtlai District Task Force for Routine Immunization on Elimination of Measles and Rubella chuan DC Conference Hall-ah thutkhawm an nei a, Pi Margaret J. Vanlalremmawii, SDO (S) chuan thutkhawm hi a kaihruai.

Pi J. Vanlalremmawii chuan Lawngtlai District atanga Measles (Sentut) leh Rubella (Sentet) um bo tura District Task Force- te hmalakna fakawm a tih thu a sawi a. Measles leh Rubella laka fihlim turin a hun taka 'vaccine' lak chu thil pawimawh tak a nih angin mitinin ngaih pawimawh a tul hle a ti. Sakhuana leh thil dang vanga Vaccine la duh lo an awm thin chu veiawm a tih thu tarlangin, vaccine lak hlauhawm loh zia, natna hlauhawm laka min venghimtu zawk  a nihna te chu uar zawka inzirtir a ngai hle ti a. Mi thenkhat chuan vaccine hrim hrim an pawngpaw hlauh thin a ni tiin, vaccine thatna leh hnathawh dan diktak mipuite hnena hrilh kawngah chanchinbu mite an pawimawh hle tih sawiin, thahnem ngai taka zau zawka puan darh sak turin a ngen a. Harsatna tam tak karah hmalam pana ke pen zel a tul tak zet tih sawiin, Pi J. Vanlalremmawii chuan 'District Task Force' te thahnem ngai taka thawk zel tur leh Lawngtlai district- mipuite pawhin lo tawiawm zel turin a sawm a ni.

Dr. S.Thaizi, District Immunization Officer (DIO) chuan Measles (sentut) chuan piansualna piah lamah thihna hial a thlen thei a, nu naupaiin Rubella (sentet) a veiin, nauchhiat, thla kim lo a nau neih leh naute ah mitdelna hial a thlen thei a ni, a ti a . Heng natna laka him theihna ber chu tha tak leh kim taka vaccine lak a ni, a ti. Sentut leh sentet bikah  Vaccine dose hnih pek thin niin, dose khatna MR1 hi nausen thla 9  thleng hnenah  pek  niin,thla  16 atanga thla 24 inkarah dose hnihna MR2 hi pek leh nibawkin, dose hnih lakim te hi 'Fully Immunized'  an ni.  a ti. Measles leh Rubella natna laka him nan a hun tak leh a dose ang thlap a vaccine la thin turin Lawngtlai District mipuite a sawm nghal bawk.

Dr. Jyashmi Rabha, (RRT- WHO) chuan Measles (Sentut) leh Rubella (Sentet) a  Lawngtlai district dinhmun tlangpui report pekna a nei a. April atanga June, 2024 thlenga naupang Fully immunized chu za zelah 69 niin, td10 - 42% leh td16-27%  a ni, a ti a. Raltlan zingah Vaccine pek niin, record mumal tak erawh a awmlo a ti. January atanga June 2024 thleng  naupang (0-59 months) monitored zat chu 4268 niin khua (village) 201 monitored a ni tawh bawk a ti a. Routine Immunization Session vawi 82 neih tawh niin tun dinhmunah vaccine dose kima la tawh  (coverage percentage) chu za zelah 90 a ni mek a ti. Kum 2023 khan sentut vei nia rinhlelh (suspected case) 12 awmin kuminah hian mi 9 rinhlelh an awm mek tih tarlangin, nunna chan ta erawh an awm lo a ti. Measles (Sentut) leh Rubella (sentet) ah medical doctor -20 %  leh  ANM-  80% training pek tawh niin ASHA te training kalpui mek niin, ni 31 August, 2024-ah training hi zawh hman beisei a ni a ti. District Task Force review meeting vawi -1 neih tawh niin, district weekly review bik  vawi- 6 neih tawh a nih thu a tarlang bawk.

Vawiin thutkhawmah hian Sr. Chief Medical Officer, District Immunization Officer, District Programme Manager (CMO), Circle Officer, ICDS, SBC-UNICEF, SPO-UNDP, VCCM-UNDP, DPM-NHM bakah LWA leh MJA aiawhte an tel a ni.