2659/2026-2027

Aizawl the 14th October, 2026: Ni hnih awh tur 'Two-Day National Seminar on Fire and Financial Management for Disaster Resilience' chu Centre for Disaster Management, Mizoram University leh Oil India Limited tangkawp buatsaihin YRC Convention Hall, Falkland, Aizawlah nimin khan hawn a ni a. Vawiin khan BSI Hall, Khatlaah hman chhunzawm a ni. He hun hi Education Minister Dr. Vanlalthlana chuan khuallian niin a hmanpui.

Khuallian Dr. Vanlalthlana chuan Mizoramin thingtlang leh khawpuiah kangmei chhuak kaihhnawihah chona lian tak a hmachhawn mek thu a sawi a. Thingtlangah lo hal atanga ram kang thin laka himna turin kan chin dan leh thiamna thar hman kawp a ngaih thu leh, khawpuiah pawh in sak dan khauh zawk leh him zawka hman a tul thu a sawi.

Minister chuan chhiat rupna a thlen hnua tanpuina sum inpek ringawt aiin, chhiatna a thlen hmaa lo inbuatsaih a pawimawh zawk thu a sawi a. Sawrkar sum ringawt a tawk loh avangin mipuite hnena insurance pawimawhna inzirtir a tul thu sawiin, kang mei emaw lei min emaw avanga chhungkua an tlak chhiat phah loh nan mipuite chu insurance lama inzirtir a pawimawh tih a sawi. Zirlai leh mi thiam kal khawmte chu an thiamnate sawrkar leh mipuite tana tangkai taka hmang turin a chah bawk a ni.

He seminar hi 'International Day for Disaster Risk Reduction' pualin October ni 13 leh 14 chhungin neih a ni a. Kangmei laka inven dan bakah natural gas hman dan leh sum enkawl dan te zir ho a ni.