2660/2026-2027

Dated Aizawl, the 14 October 2026: Vawin khan Food, Civil Supplies & Consumer Affairs Department, Govt. of Mizoram leh Bureau of Indian Standards (BIS) Kolkatta Branch-te hmalaknain ni khat awh, ‘Workshop on ‘BIS Certification Process’ for officials of selected departments of Mizoram’ chu I&PR Conference Hall, Lianchhiari Runah neih a ni a. ‘BIS Certification Process’ chungchanga zirtirna pe turin BIS, Kolkatta Branch Office atangin Pu Barun Das, Scientist D/Joint Director, chu chah chhuah a ni.

Workshop hi Pi Esther Leihang, Deputy Director, FCS&CA Department chuan kaihruaiin kalkhawmte lawmna thu a sawi a. Pu Malsawmzuala, Joint Director, FCS&CA Department chuan thusawiin, Mizoram Sorkar hnuaia thlanchhuah bik departments 10-te tanahe workshop chu buatsaih an nih thu leh, India ram state dangah pawh chutiang workshop chu thil awm zen zen lo a ni tih a sawi a. BIS nihphung leh hmalakna thenkhatte sawifiahin, Pu Malsawmzuala chuan, ‘BIS chu ram pum huap pawl pawimawh (National body) a nih thu leh India rama kan bungraw hmante a tha tawk em tih enfiahtu leh bungruate chu a that dan mil zela chhinchhiahna petu an ni’ a ti a. Mizoram Sorkar nen pawh FCS&CA Department kaltlangin thawh hona tha tak an neih thu te, Mizoram-ah pawh department tin, PSU leh contractor ten an thil siamchhuah reng rengah bungrua, a tehna tling ngei an hman zel theih nan nasa lehzual a hmalak zel tum a nih thu leh hemi kawnga mipui inhrilhriatna (awareness program) pawh uar leh zuala kalpui tum a nih thu a sawi bawk a ni.

Vawiina Workshop-ah hian Mizoram Sorkar hnuaia thlanchhuah bik department 10 atangin mi 30 vel an kalkhawm a. Workshop hi hun hnih: Chawhma hun leh Chawhnu hun-ahte then niin, Pu Barun Das, Scientist D/Joint Director, BIS Kolkatta chuan thupui thlanchhuah, ‘BIS Certification Process: A Detailed Overview’ hmangin Presentation a pe a. Officials-te nen zawhna leh chhanna hun hlawk thlak tak hman nghal niin, Pu Lalrinsanga, Joint Director (Supply), FCS&CA Department chuan lawmthu sawiin Workshop hi a khar a ni.