4634/2024-2025

Aizawl dated 13th March, 2025: Vawiin chawhma khan I&PR Conference Hall, Lianchhiari Run ah Mizoram Information Service Association Annual Conference chu Dr. Vanlalthlana, Minister, I&PR Department chuan khuallian niin a hmanpui a. Pu Pratap Chhetri, Deputy Director chuan hun kaihruaiin MIS Officer, Directorate-a thawk te leh District hrang hranga awmte an tel a ni.

Khuallian Dr Vanlalthlana chuan Mizoram Information Service officer-te chu sawrkar leh mipui inkara palai hna thawktu pawimawh tak an ni tih inhre reng tura chahin, tunlai khawvel thiamna thang zelah anmahni pawh intuaithar reng tur leh inzir thar zel turin a chah a. Khawvel mit hmuha Mizoram leh Mizoram sawrkar hmel phochhuaktu chu MIS officer te an nih thu sawiin, an hnathawh hrang hrangah thil thar leh tangkai ngaihtuah chhuak tura rilru seng zel turin a fuih. I&PR Minister chuan Department kaltlanga mipui rawngbawl hna sawt zawka kalpui a nih theih nan a tul angin amah finchhuah zel turin a chah a, a tul a nih phawt chuan amah ngei pawhin bawhzui ngaite a bawhzui hreh dawn loh thu a sawi a ni. MIS officer leh an hnuaia thawktu indaihlohzia a hriatpui thu Minister chuan sawiin hnathawh nana mamawh bungraw hrang hrang pawh phuhruk a nih theih nan theihtawp a chhuahpui tur thu a sawi.

Pu Malsawmsanga, Deputy Director leh President, MISA tarlan danin MIS junior grade post awm atangin za zela 56 chu hnawhkhah a ni lo a, Aizawl district vil tur Information & Public Relations Officer pakhat chauh a awm thu a sawi. Social media kaltlanga hmalakna kalpui thin dan tarlangin Sawrkar hmalakna hrang hrang mipui hriata phochhuah nan Instagram, X, Facebook leh YouTube-te tangkai taka hman a nih thu a sawi a. MIS Officer-ten hna sawt zawka an thawh theih nan leh an thiamnate an tah hriam zel theih nan 'The Mizoram Information Service Training Regulations 2024' pawh a taka hman tan thuai theih nan duan fel a nih tawh thu a sawi. 

Pu C.Lalnunkima, Director, I&PR Department chuan thawktu indaih lohna karah Sawrkar hmalak puanchhuah hna bahlah miah lova thawktuten an kalpui thin chu fakawm a tih thu sawiin MIS Officer-te chu Sawrkar leh mipui thlunzawmtu pawimawh tak an nih thu a sawi a. District office-ah hna tha taka kalpui a nih theih nan lirthei mamawhna a nasat thu a sawi. MIS Association Annual Conference 2025 chawhma hun ah hian Pu Andrew H Lalremruata, Deputy Director chuan report pein Dr. Lallawmkima, PRO to Governor chuan lawmthu sawina hun a hmang bawk a ni.