No.912/2020-2020

Vawiin khan Champhai District Level Task Force on Covid-19 chu Covid-19 Medical Operational Team Chairman Dr. ZR Thiamsanga, MLA, Vice Chairman, Health & Family Welfare Board nibawk hovin DC Conference Hall-ah an thukhawm a, Champhai district chhunga Covid-19 venna kawnga hmalakna hrang hrangte thlirhoin, hripui len hnua ei leh bar intodelh anih theih dan turte an sawiho a ni.

Dr. ZR Thiamsanga chuan Covid-19 hripui laka Mizoram a him theihna tura thathawhtu zawng zawngte chu fakawm tiin, Champhai district chhunga intawiawmtawnna leh thawhhona tha tak awm chu lawmawm a tih thu a sawi a. Hripui zawh hnua ei leh bar kawnga harsatna thleng thei turte ngaihtuah lawk a ngaia, intodelh thei tura hmalak angai ani, a ti a. Covid-19 hripui leng mek chu khawvelin a la hmelhriat chian tawk lova, zirchian mek zel anih avangin fimkhur tluk a awm rih loh thu leh Mizoram dinhmun a tha riha, State pawn atanga rawn hawte pawh ramri luhkaah enfiaha, Rapid Test Kid hmanga Rapid Antibody Testing tih vek hnuah Quarantine Centre-ah khunghran zel an ni, a ti a. Ramri depa awm State kan nih avangin kan fimkhur lehzual angai takzet a, thalai rual te’n ramri venga theihtawp an chhuah mek laia khawchhunga zalen leh inthlahdul lutuka lo awm chu a diklo hle a, he natna hi kan chian tawk loh avangin ramri luhka venhim hi kan khauh hle a ngai ani, a ti a. Mipuite chu an himna tura sawrkarin zawm tura a tihte ngaipawimawha thuawih taka zawm hram hram turin a ngen a. Sawrkarin ramri vengtute hriselna a ngaipawimawh em em a, thosilen 2000 (Sanghnih) ramri vengtute hman tur a lei thu sawiin, Quarantine Centre-a awmte mamawh leh hriselnate pawh ngaihven reng ani, a ti a. Champhai district mipuite chu hripui leng mek Covid-19 do kawngah theihtawp chhuah chhunzawm zel tur leh hotute tawiawm tlat turin a ngen bawk a ni.

Pu Mark Lalthanliana, Deputy Commissioner Champhai chuan Covid-19 dona kawnga hmalaknate enfiaha tura Covid-19 Medical Operational Team Chairman Dr. ZR Thiamsanga, MLA, Vice Chairman, Health & Family Welfare Board nibawk a lokal chu lawmawm a tih thu a sawi a. Champhai district-ah Quarantine Centre 3 a awm mek thu leh mamawh thulh atan Quarantine Centre hual lawkte pawh neih niin, tun dinhmunah mi 34 te DPRC Quarantine Centre-ah khunghran mek an nih thu a sawi a. Ramri kaltlanga lut leh chhuak turte Police, YMA leh VLTF ten an veng mek zel a, khawchhung veng tinah ngawrh taka duty mek zel ani, a ti a. DLTF leh VLTF te inkara intawiawmna tha tak awm chu entawntlak hlea a hriat thu sawiin, ramri venghim tura thawktute chhuanawm a tih thu a sawi a. Mi harsate tan a thlawna buhfai pek niin, ration card nei lo te thlenga chhawmdawl dan ngaihtuah ani, a ti a. District Bawrhsap chuan Nodal Officer leh Incident Commander mawhphurhna siam hrang hrangte leh an hnathawh dante a sawifiah a. May Ni 4 (Thawhtanni) atanga tanin zan dar 7 atanga zing dar 4 inkarah Curfew neih thin anih thu a sawi bawk.

Dr. R.Lianmawia, CMO Champhai chuan Undivided Champhai district-ah theih ang tawka inpuahchahna kalpui mek zel anih thu leh ramri venga thawktute hriselna an ngaipawimawh thu sawiin, Covid-19 Medical Operational Team Chairman Dr. ZR Thiamsanga'n CMO Office Champhai hnenah, Rapid Test Kid 100, Thermal Scanner 4, PPE 100, Thosilen 127, VTM (Viral Transport Medium) 50 leh hmanraw dang Sanitizer, Odomus leh a dangte a hlan avangin lawmthu a sawi a. Dr. Zatluanga, District Medical Superintendent leh Chairman, District Medical Board nibawk chuan pawn lam atanga lo lutte Home quarantine tur an nih leh nih loh chungchang zirchianga rawtna siam tu tur an nih thu sawiin, mamawh huna che chhuak tura an inrin reng thu a sawi bawk.

Pu George Lalthanngura, DAO Champhai chuan tampui thlen lohna turin mamawhna avangin chhungkaw 1479 chul rit tura an in report thu leh buh mai ni lo chaw a rin theih dang, dah that theihte ching uar deuh deuh tura inzirtir ani, a ti a. Tlang buh chi tur mamawh angte intodelh ani a, Vaimim chi quintal 50 chuang semchhuah tawh niin, thlai chi mamawh zawng zawng pe chhuak thei lo mah ila thahnem tak pekchhuah a ni, a ti bawk. Dr. B.Zonghinga, DVO Champhai pawhin Meat Supply Chain-te chatlaklo tura tanlak zel anih thu a sawi a. Sial vulh khaw 20 an awm mek thu leh Vawk leh Ar sa pawh chatlaklo tura hmalak ani, a ti a. Pu Spencer Vanlalchhuanga, DCSO chuan buhfai mamawh pekchhuah kawngah harsatna a awm lova, theihtawp chhuaha hmalak zel ani ang, a ti bawk.

Meeting-ah hian ramria venbukte dinhmun zirchiana mamawh zualte sum neih dan ang zela thawmthat nise tih a ni a. Hripui len hnua ei leh bar dehchhuah leh intodelh kawngah chak zawka hmalak anih theihna turin District Level Committee din remtih niin, Chairman atan Pu TJ Lalnuntluanga, Law & Judicial Minister & MLA, Champhai South A/C chu ruat a ni a, Advisor atan Dr. ZR Thiamsanga, MLA, Champhai North A/C leh Pu Ramthanmawia, MLA, East Tuipui A/C te chu ruat an ni a. Co-Chairman atan Champhai Bawrhsap, Member Secretary atan DAO, Asst Secretary atan SDHO, Member tur atan BDO, DFDO leh DVO te ruat niin, a tul ang zela siamrem nise tih a ni a. Ramri kaltlang tumte khauh lehzuala ven uluk angaih thu leh ramri kan luite chungah dan anga hmalak zel a tul thu tarlan niin, thawhhona leh intawiawmtawnna tha zawk vawnnun zel nise tih a ni bawk.

Meeting zawh hian Dr. ZR Thiamsanga chuan a bial chhung Hmunhmeltha leh North Khawbung khuate tlawhin VLTF te a kawm a. Heng a tlawhna hmunahte hian buhfai a sem a, Sub-Centre a hman tur Mask, Glove leh Hand Sanitiser-te a sem bawk a. Hmunhmeltha MNF Unit 1 leh 2 atangin CM Relief Fund chhunluh Rs 5,000/- a dawng bawk a ni. Covid-19 hrileng mekah mipuite chu hmaituamna vuah uar tur leh intodelh tura Lo hna te thawk nasa zual turin a fuih a ni.