Vawiin chawhnu khan Dr. ZR Thiamsanga, Champhai North bialtu MLA leh Vice Chairman Health & Family Welfare Board hovin Corona Virus leng laka invenlawkna tura hmalak tawhna leh hmachhawpte Champhai Circuit House Conference Hall-ah sawiho a ni.

Dr. ZR Thiamsanga chuan tunlaia China, khawvel ram dang leh India ram chhung ngeia leng mek Corona Virus natna do nan Sawrkar laipui, State leh District thuneitute'n nasa taka tan an lak mek zel thu a sawi a. India ramah he natna vei hi mi 30 hmuh niin, thih pui an la awm loh thu leh Mizoramah chuan  vei hmuh chhuah an la awm loh thu a sawi a. Corona Virus natna laka invenlawkna tur chuan kan zavaia kan tan tlan angai a ni, a ti a. India leh Myanmar inkalpawhna pawimawh tak Zokhawtharah tun aia chak leh hmanraw tha, thawktu thahnem zawk nen hmalak angaih thu leh ramri depa khaw awm 9 ah te inzirtirna zau zawk leh hriselna lam kawnga inenfiahna changtlung zawk nei tura hmalak a tul thu a tarlang a. Natna rawn lanchhuah tak tak hun Incubation period chu ni  7 thleng anih vangin fimkhur angai lehzual a ni, a ti a. Sawrkar laipui nena tang tlangin hmalakna kalpui zel ani a, State Level Task Force bakah District Level Task Force pawh dina chak taka hmalak zel ani tiin, inhmakhua lawkna hrang hrangte a tarlang a. Champhai ramri atanga natna kaidarh anih lohna  tura hmalakna tun aia chak zawka kalpui vat ngaih thu a sawi bawk a ni.

He hunah hian Champhai Bawrhsap Pu SL Naveen  chuan Sawrkar, NGO, VC, Assam Rifles,  Media  leh mipuite mawhphurhna leh tih theih tur hrang  hrangte sawiin, zinmite pawh natna len hunchhunga ram danga zin lo turin a ngen nghal a. District mipuite thahnemngai taka thawhpuiah a sawm a ni.

Dr. R. Lalawmpuia, CMO Champhai pawhin thusawiin,  District levelah a hma thei ang bera hmalakna Cross Border Vaccination Booth, Zokhawtharah  kalpui  anih thu a sawi a. Ramri dep khuaahte  mipuite zirtirna leh hrilhhriatna  neih ani, a ti a. Champhai District Hospital-ah Isolation Ward khum panga awmna siam anih thu leh tumah rinhlelh an la awm loh thu a sawi a. District mipuite chu chiai lova a inven theih dan kawngte tha taka zawm turin a chah a ni. 

Dr. Samuel Laldinthara, MO, IDSP, District Hospital, Champhai chuan Zokhawthar a Screening kalpui dan sawifiahin, mi 379 te Medical Screening neih tawh niin rinhlelh hmuh anih loh thu a sawi a. Khualzinte chu an zin leh veivah dante zawtfiahin, endika thermal screening tihsak thin an ni, a ti bawk.

Meeting-ah hian Assam Rifle lam hotute pawhin Corona Virus darh zel tur ven kawngah theihtawp chhuah an inhuam thu leh hriselna kawnga thawktu leh hmanrua an neihte a tul hun apiangah thawhchhuahpui an inhuam reng thu an sawi a. Dan lova ramri kaltlanga thil tih leh natna leng tur dan kawngah mipuite tawiawmna an ngen bawk a ni.

Vice Chairman, Health & Family Welfare Board hova thukhawm chuan March Ni 9, 2020 a Zokhawthar tlawha Medical Screening tih dan leh hmunhnate District Administration, Official, NGO leh Media-te nena  tlawh nise  a ti a. Darkar 24 chhunga duty theihna tura hmalak leh  ram dang atanga khualzinte  hmaih awm lova a tul anga endik zel nise a ti bawk. 

Corona Virus chungchang zau zawka inzirtirna, YMA, VC, hriselna kawnga thawktute leh mipuite tana kalpui zel nise, Cable TV Talk Show leh Chanchinbu hmanga inzirtirna te kalpui nise tih a ni bawk a. Thukhawm chuan Police leh Assam Rifle ten dan lo anga ramri kan leh rinhlelhte lo enfiah se, inhrilhriatna Lehkhabu te Leaflet siama semchhuah bakah tul bikahte hriselna kawnga thawktu tur  a tla chawpa lakbelh mai nise a ti bawk a. Hmalakna ang reng reng a zau thei ang bera puandarh nise ti bawkin, State IDSP Nodal Officer hnenah hmalaknate hrilhhriat zel nise a ti a. A tul ang zelin  inrawnkhawmna  leh sawihona hun District Level Committee neih leh nise tih a ni.