Chapchar Kut 2020 ni hnihna, a lawmna ropui ber chu vawiin khan Lammual, Aizawl ah neih a ni a. Chief Minister Pu Zoramthanga chu Kut Pa niin Art & Culture Minister Pu R. Lalzirliana chu Kut Thlengtu a ni.

Kut Pa Chief Minister chuan ropui leh hlim tlang taka Mizote kutpui Chapchar Kut hman a ni thei chu lawmawm a tih thu a sawi a. Kumin kut thupui chu "Zonun zemaw chawi san" a nih angin Zofate chuan khawihmun pawh ni se zonun zemaw chu lanchhuahtir zel tur kan ni, a ti a. Malsawmna kan dawn meichher te, chanchintha kan dawn meichher te, tlawmngaihna meichher te chu chhi engin, state chhung leh pawn mai bakah khawvel zau zawkah kan meichher kan ti eng tur a ni, Kut Pa chuan a ti a. Kan hnam nun tha leh mawi hi midangte tan entawntlak a lo nih theih nan Chapchar Kut a lo thlen hian mitinin midangte entawntlak a nun tum thar leh turin kut hmangtute a chah a ni.

Kut Thlengtu Art & Culture Minister chuan Chapchar Kut chu kut hlimawm satliah mai nilovin, inunauna leh inlaichinna tha zawk a lo awm a, mitin lungrual taka induhsak tawn taka an awm hun a nih thu a sawi a. Ruahman lawk ang taka kut hman a ni leh thei chu lawmawm a tih thu sawiin, chhimtute zawng zawng chungah leh ram pawn atanga lo kal zawng zawngte chungah lawmthu a sawi a ni.

Kumin Chapchar Kut lawmnaah hian Laos, Myanmar, Indonesia, Brunei, Cambodia, Phillipines, Vietnam atanga India rama an palai te an tel a. Rev. Zolawma, Wales pawh telin ani hian Kut Pa hnenah Harp a hlan a ni. Organizing committee in a sawm angin Tahan, Falam, Tiddim, Halkha atang te in leh Shillong, Manipur, Silchar, Haflong leh Tripura group YMA te kut hmang tur hian an kalkhawm a ni.

Kut lawmna ni hnihna ah hian CYMA President Pu Vanlalruata chuan kalkhawmte lawmna thu sawi bawkin, malzai leh zaipawl hrang hrang ngaihthlak niin, hnam lam hrang hrang thlirho a ni bawk a. YMA branch 95 atangin Cheraw kanpui an lam a. Bu 128 awmin a kantu leh khawngtu zawng zawng mi 2175 an ni. Chapchar Kut hman chhung hian food court te, handloom leh handicraft stall te, art exhibition leh flower show te buatsaih a ni bawk.