Tukin khan Chief Minister Office ah Mamit District a khum 100 awmna hospital sakna turin Memorandum of Understanding, thawhhona thuthlung chu Health and Family Welfare Department leh Power Finance Corporation ten an ziak. He MoU ziahnaah hian Chief Minister Pu Zoramthanga leh Mamit bialtu MLA Er. H. Lalzirliana te an tel a ni.
Chief Minister chuan Mamit chu Aspirational District a nih angin kawng hrang hranga hmasawnna hna thawh a pawimawh thu leh, chung zingah chuan mihring hriselna leh inenkawlna tihhmasawn chu a pawimawh zual thu a sawi a. Power Finance Corporation ten an Corporate Social Responsibility kaltlanga district mamawh tak mai hospital building thar din a ni thei tur chu lawmawm a tih thu a sawi a ni.

Mamit MLA Er. H. Lalzirliana pawhin district in hospital thar a nei tur chu lawmawm a tih thu leh, tha tak leh chak taka hna kalpui a nih theih nan tha taka vil a nih tur thu a sawi bawk.

Vawiina thawhhona thuthlung ziah tak hi Health Secretary Pu H. Lalengmawia leh Power Finance Corporation atangin Pu Praveen Kumar Singh, Director (Commercial) ten an hming an ziak a. Mamit District Hospital building thar sakna tur project hi a hming "Construction of District Hospital Mamit In- Patient Department (IPD) block" tih niin project cost hi Rs. 17.93 crore a ni a. Power Finance Corporation hian Rs. 12.5 crore an tum ang a, a bak zawng chu state in a tum dawn a ni. Kum hnih chhunga zawh tura ruahman a ni.

MoU ziahnaah hian Directorate of Hospital and Medical Education hotute leh Power Finance Corporation atangin an Commercial Director bakah R. Murhari, Executive director (CSR & HR) leh Shwetabh Verma, DGM te an tel a ni.

Attachment

  • Loading attachment...