Dr. Z.R Thiamsanga chuan Covid-19 do kawnga Official, VLTF, NGO, Kohhran leh Media-te thawhhona tha tak avanga Champhai District-in vawiin thlenga Covid-19 hri kai darh tur theihtawp chhuaha hlawhtling taka a do zel thei chu fakawm a tih thu a sawi a. Hmalak tawh leh hmachhawpte sawihona hun tha tak mithiamte nena inrawnkhawmna nei tura ruahmanna buatsaih a ni  chu lawmawm a ti a. MOT leh ZMC tangkawp zirchianna atangin hri inkai darhten Covid Appropriate Behaviour (CAB) an zawm tha tawk lo tih hmuh chhuah a nih thu sawiin, hri leng do kawngah sawrkarin theihtawp chhuaha hma a lak zel thu leh, test chak leh tam zawk kalpui a nih avangin hrikai hmuhchhuah a tam thu a sawi a. Oxygen Generating Plan hman mekte bakah PM CARES Fund kaltlangin Oxygen tam zawk pe chhuak thei tur khawlte bun belh mek zel a nih thu sawiin, tun dinhmunah Oxygen mamawh angte hmuh niin harsatna a awm lo a ni, a ti a. Hrilengin hun engemawchen a la awh dawn avang leh min la chenchilh dawn avangin Covid-19 nena kan nun thiam a tul a, a bikima indanna vaccine lak leh Covid-19 hri laka him tlanna tura nunphung mawi leh zawm turte tha taka zawm chunga nun a ngai a ni tiin, Chanchinbumite leh kalkhawm dangte chu mi dangte tihhmuh leh zirtir kawngah tan la sauh sauh  turin a chah nghal bawk a ni.  

Champhai District Bawrhsap Pi Maria C.T Zuali chuan hun chep tak karah Health & Family Welfare Board Vice Chairman leh Medical Operational Team (MOT) Chairman ni bawkin mithiamte hruaia Champhai tlawha zirtirna an rawn pe chu lawmawm a tih thu a sawi a. Mipuite chu Covid-19 chungchanga social media kaltlanga thuthang lengvak nazawngte awih lo tur leh, sawrkar thuchhuah leh mithiamte thurawn ngaipawimawh zawk fo thin turin a chah a. Covid-19 do let kawnga thahnemngai taka thawktu zawng zawngte fakawm a tih thu sawiin, international boundary hrula awm Champhai District-ah hri ven kawnga tha thlah lova tan a ngai zual tih hriaa theihtawp chhuaha thawktu VLTF, Police, NGO, Official dangte leh Media-te chungah lawmthu a sawi bawk.

He hunah hian Civil Hospital Aizawl atanga Dr. Z.R Thiamsanga tawiawmtu Dr. C.Lalhmuchhuaka, Medical Superintendent leh Dr. J.Lalramchhuanga, Physician-te hnen atangin vaccine lak tulna leh hlauhawm lohnate, Covid vei enkawl leh a na zual refer chungchangte, Virus nihphung leh Test chungchanga hriat tulte, Covid Appropriate Behaviour leh Discharge policy bakah, mitthi sawngbawl dante ngaihthlak a ni a. Covid-19 hrileng ven leh do kawnga inkaihhruaina chhuah thinte chu zirchianna   behchhan ang zela kalpui a nih thu tarlangin, mipuite chu Covid-19 laka him tlanna tura sawrkarin inkaihhruaina a siamte tha taka zawm tur leh, a bikima vaccine la theuh turin an chah a ni. 

He hunah hian Dr. R.Lianmawia, CMO Champhai hnen atangin Champhai District dinhmun tlangpui ngaihthlak a ni a. Hrikaite chu a tlangpuiin District pawn lam atanga lo haw an nih thu leh, hrikaina hriat lohte pawh chhui chian hnuah chhut chah zel thin an ni, a ti a. Vaccine session 175 neih a nih tawh thu sawiin, vaccine pekchuah dan tlangpui a tarlang a. Champhai District atanga sample lak thenkhatte Genome sequencing ti tura thawna ngaihchan mek  a nih thu leh, Juvenile Covid Care Centre pahnih, Champhai Vengsang PCI Kohhran Hall leh Hospital Veng PCI Kohhran Hall-ahte ruahman a nih thu a sawi bawk.   

Dr. Zatluanga, DMS Champhai hnen atangin DCHC inbuatsaihna kalpui dan ngaihthlak a ni a. Minute khata Oxygen litre 80 pe chuak thei Oxygen Generating Plan, District Hospital Champhaia hman mek bakah, PM CARES Fund kaltlangin minute khata Oxygen litre 500 pe chhuak thei tur Oxygen Generating Plan lian zawk bunfel hna zawh thawkhat a nih thu leh, a khawl rawn thlen hun ve leh peihfel  a nih tur thu ngaihthlak a ni. 

He hunah hian zawhna leh chhanna hunte hman niin, Covid-19 chungchanga hriattur tul inzirtirna zau zawka neih a tul thute tarlan a ni bawk. Tun dinhmunah Champhai District-ah Covid-19 hrikai hmuhchhuah enkawl lai 100 awm mekin, dama chhuak 305 leh hri vanga thi 1 a awm tawh a, hri kai tawh zawng zawng zat chu 406 a ni.  

Vawiin chawhma khan Health & Family Welfare Board Vice Chairman Dr. Z.R Thiamsanga, Champhai North bialtu MLA chuan District Hospital Champhai tlawhin Oxygen Generating Plan siam mek leh Hospital Complex-a leitawlh vanga harsatna awm a enfiah a. Champhai khawpui tawt lutuk tihziaawm dan tur leh inkalpawhna him leh mumal zawk awm theih dan turte enfiah bawkin, DK Traffic Point Vengthlang-a Flyover siam dan turte, Dawrkaikawn Kahrawt veng kawng pengthuam tih zauh dan turte leh Hospital Road, Vengsang kawng laihzauh leh a nghawngte Official leh khawtlang hruaitute nen an enfiah bawk a ni.