No.1556/2021-2022     

Aizawl, the 26th July 2021: Vawiin khan Tourism Minister Pu Robert Romawia Royte chuan Chite Venga Convention Centre sakna tur hmun leh sa tura ruahmanna siam dante a hmunah kalin a enfiah a.He Centre bula tunhnaia tuilianin Chite Lei a tihchhiat pawh a hmunah a enfiah bawk.

Tourism Minister Pu Robert Romawia Royte chuan ama bial chhung ngeia Convention Centre tha tak sa tura Mizoram Tourism Department ruahmanna Sorkar laipuiin a pawma sum tam tak a sanction chu lawmawm a tih thusawiin he Centre hi Sorkar Department hrang hrangte leh Aizawl mipui mamawh chhanna a ni a ti a.Tuna ruahman  ang chuan he Centre ah hian Auditorium,Meeting Hall 6,Riahna Room 8,Library,Coffee Lounge,Office Room,Health Club,Visual and Audio Equipments,Choka etc bakah parking hmunte a awm ang a. A panna kawngpuite siamin a compound te pawh cheimawi a ni ang. Minister chuan Chite Convention Centre hi Tourism Ministry in Central Agency Scheme atanga project a sanction hmasak ber a ni a,hetiang tihlawhtling thei Tourism Deptt chu fakawm a tih thu a sawi a ni.

He Centre sakna tur bul lawka Chite lei kum 2017 a dawh chu tunhnaiah tuilianin a tichhia a,a hmuna entu bialtu MLA leh Minister ni bawk chuan lei hi a quality a chhiat em avanga bung ta nia a lan thu sawiin pawi a tih thu a sawi a.Helai lei hi Convention Centre panna atan a pawimawh avangin he convention centre project atang hian lei chu dawhthat nghal ve mai nise tiin Tourism Ministry-a a rawt thu leh an lo remtih avangin Chite lui lei chhiatna hmunah lei thar a tha law law dawh leh thuai tum a nih thu a sawi a. He hunah hian WAPCOS Consultant ten a building sak dan tur leh a facilities awm dan turte an sawifiah a ni.

Tourism Minister Pu Robert Romawia Royte chuan Covid hripui avangin Mizoram Budget a sum Central sorkar rawn tum tura beisei tam tak chu nikum leh kumin kum kal mekah pawh a taka Central sorkarin a rawn release theih loh avangin suma harsatna a khirh hle a.Kan state budget sum ngei pawh a taka kan hmuh loh avang hian Mizoram budget pawn lam atanga hmasawnna sum atam thei ang ber hai luha hman nghal zung zung a pawimawh thu sawiin Tourism  Department hotute leh a Construction Agency lam pawh sum hman chaka instalment dang hai luh ran a pawimawh thu a hrilh a ni.Tourism Minister chuan Chite Convention Centre chu Mizo hnam rohlu tling tur a nih avangin a design leh a sakhmang pawh a tir atanga a tawp thlengin a tha thei ang bera ni tur a ni a ti a.

Convention Centre saktur hi Chief Minister Pu Zoramthanga pawhin a phurpui tih a sawi a. A hmun tur hi tlawh tawhin a saknan Chite Horticulture ram zau tak Tourism Department kuta hman phalna a pe tawh a ni a ti.

He meeting a report petu Pu V.Lalengmawia, Tourism Director chuan Convention Centre hi Ministry of Tourism hnuaia Scheme of Assistance to Central Agencies for Development of Tourism Infrastructure sum Rs 4000 Lakh hmanga sak tur a nih thu sawiin he Convention Centre hi he Scheme atanga Tourism Ministry in state tana sum a sanction hmasak ber a ni a ti a. Mizoram Sorkar nena Agreement ziah a nih angin Ministry of Water Resources hnuaia Central PSU lar tak WAPCOS chu a satu tur Executing Agency a ni a. Ministry of Tourism chuan sum first instalment Rs 1570 lakh chu WAPCOS kutah a release tawh a ni. He project atana sum sen ngai zawng zawng hi Central Sorkar tum vek tur a ni a, sak zawh hnua kum 3 thleng enkawlna senso pawh he scheme atanga tum tur a ni. Hna thawh zawh veleh Mizoram Sorkar Tourism Department kutah hlan a ni dawn a ni.

Vawiin vek khan Tourism Minister Pu Robert Romawia Royte chuan a bial AMC Ward VIII huam chhunga veng 3 Armed Veng,Armed Veng South leh Chite Vengte puala din Chite Veng 4C chu a tlawh nghal a.LLTF te leh Khawtlang hruaitute nen inkawmin covid donaa hmalak zel dan turte an sawiho a. Minister Pu Roberta chuan Aizawl E-II bial chu Covid vei tam berna bial a ni rei tawh viau nachungin khawtlang,Kohhrante leh mipuite tanrualna a tha a,bial chhunga LLTF te,Councillors te leh MLA te hian theihtawp kan chhuah a,covid hripui kaihhnawih harsatnate hi khirh viau mahse hneh ngei turin pheikhai rual takin kan bei zel dawn a ni a ti.

Minister hi a enkawl Department official te bakah Engineers te leh Chite Veng khawtlang hruaituten an tawiawm a ni.