No.7636/2020-2021

Vawiin khan Mizoram Amatuer Taekwondo Association Hall, Republic Vengthlangah 15th Mizoram Open Taekwondo Championship hawn a ni a. He Championship hawnna inkhawm a khuallian Dr. ZR Thiamsanga MLA, Vice Chairman, Health and Family Welfare Board chuan Taekwondo hian mihring nuna awm tura kan duhthusam ruihtheihthil laka inthiar fihlimna te, hotute zah thiamna te, thuawihna te, nungchang mawi, dawhtheihna, insumtheihna, teirei peihna leh midang tana nun tam neih hi a tum ber a ni a. Mizo tawngah hian Taekwondo awmzia tluk thei tur thumal pakhat chu tlawmngaihna hi nia a lan thu sawiin, chutiang taka mahni inthununna leh midang tana nun tha tak lan chhuah tir theihna a nih avangin nasa leh zuala naupang leh thalaiten kan uar deuh deuh tul a tih thu a sawi. Tin, Mizo tlawmngaihna nen a tum hi a inzul hle a hriat thu a sawi bawk.  Dr. ZR Thiamsanga chuan tunlai khawvel nun inthlak danglam chho zel avang a Non Communicable Diseases tia kan sawi heng Lungphuchawl, stroke, BP Sang leh zunthlum avanga harsatna leh thihna tam tak thleng thut thut dona tha ber pakhat chu Physical exercise a nih avangin Taekwondo hi kan uar chho zel a that thu a sawi bawk.   

He championship hawnna inkhawm hi Dr. Rualkhuma Colney President MATA in kaihruaiin, Pu Joseph Thansanga General Secretary chuan report pe a.  Pu VL Sawma, Senior Vice President chuan lawmthu sawiin he Championship a rawn tel infiammi District hrang hrang atanga rawn kal te tan Covid-19 laka an fihlim leh fihlim loh enna RAgT a Health Department lamin a rawn nei thei chu an lawm tak zet thu a sawi bawk. He Championship hian tunkar chhung a awh dawn a ni.