No.7637/2020-2021

Vawiin khan District Level Children Science Congress chu School Education Complex Conference hall-ah Aizawl District Samagra Shiksha buatsaihin neih a ni a, Pu James Lalrinchhana Director, School Education Department chuan a hmanpui.

Pu James Lalrinchhana, Director, School Education Department  chuan kan khawvel nunphung hi Science-a innghat anih tawh tih sawiin zirna sang zawka zirtir thei tur khawpa academic studies chu ngaih pawimawh tul a tih thu a sawi a. Director chuan thiamna sang zawk min pe turin kan ramah hnamdang kan la ruai nasa a, intodelh thei tura zirlaiten tan lak a ngai a ni a ti. Hripui leng karah zawi zawiin zirna kalpui zel a ni a, thla tharah chuan class V-VIII zirlaite pawhiin school an lut thei dawn ta a. Naupang te lam te pawh an luh theih thuai beisei a nih thu a sawi a. School Education Director chuan he Science Congress hian Science tihhmasawn leh tihlarnaah kawngro a su hle dawn a ni a ti bawk a ni.

District Level Children Science Congress hi tunkar chhung hian District tinah an remchan dan angin neih a ni a. Vawiin hian Aizawl District bakah Kolasib, Saitual leh Khawzawl District ten an nei a, nimin khan Serchhip District-in an nei tawh a, naktukah Champhai, Lunglei leh Lawngtlai District-in an nei ve leh dawn a ni. District hrang hrang atanga Child Scientist thlan chhuahte chuan March 3&4,2021 hian State Level Children Science Congress neih leh a ni ang a. District tin atanga Child Scientist kalkhawmte chu Aizawl khawpui chhunga Science zirna hmun pawimawh Beraw-a Science Centre, Pachhunga University College Science laboratory leh hmun pawimawh dangte a theih ang anga tlawhpui tum an ni.

Children Science Congress hi Central-ah kum 1993 atangin kumtin neih thin a ni a, hemi rual hian Mizoramah chuanSTAM hmalaknain neih ziah a ni a. Kum 2016 atang khan RMSA leh Science Teachers Association Mizoram chuan STAM te nen tanghovin buatsaih tan leh a. RMSA leh SSA te hi Samagra Shiksha tih a lo nih hnuah Samagra leh STAM ten an kalpui zui zel a ni. Nikumah khan he Science Congress kal zelah hian International Science Fair, Expo Mexico 2020-ah India ram aiawhin Mizo zirlai pahnih R.Lalnuntluangi leh Lalhruaitluanga St Pauls Higher Secondary School-a class XII zirlaite an tel a ni.