Vawiin khan Champhai North bialtu MLA Dr. ZR Thiamsanga, Covid-19 Medical Operational Team Chairman leh Vice Chairman, Health & Family Welfare Board nibawk chuan a bial chhung Myanmar ramri dep khua VLTF te leh ramri hrula rammu mekte a hmunah kalchilhin a tlawh a, lawmthu sawiin an mamawh angte a pe a ni.  

Dr. ZR Thiamsanga chuan Covid-19 hripui beihlet hna chu department pakhat kutah chauh nghah chi ani lova, kan zavaia tanrual angai tak meuh a ni tiin, lungrual taka kan thawhhona avang chauhin tun dinhmun hi kan thlen theih phah a ni, a ti a.  Mizo khawtlang nun chu inpawhna tha tak,  thenawm khaw veng inlenpawha inkawm nasa tak anih thu pawh sawiin,  natna inkaichhawn awlsam tak a vei tam zawkah pawh lang mai lo Covid-19 hripui chu kan khawtlang tana hlauhawm tak anih thu a sawi a.   Covid-19 laka kan him theihna turin kawng hrang hranga hmalak anih thu tarlangin, hriselna,  ei leh bar thar leh pekchhuah, venhim leh chhawmdawl hna lama thawktute   thlenga theihtawp chhuah anih thu sawiin, a bulthuma thawktu DLTF leh  VLTF hmalaknate fakawm tiin, theihtawp  chhuah chhunzawm zel turin a chah a. Ramri hrul hmun hrang hranga hmalaknate a hmuna kalchilha zirchiangtu Covid-19 Medical Operational Team chuan ram leh  hnam venhimna tura mite inpekna nasat zia an hmuh thu sawiin, ramri dep district-te  chu a bik taka ven uluk ngai leh hautak ber tur anih thu a sawi bawk. 

Covid-19 Medical Operational Team Chairman chuan hripui lo thleng mai thei laka kan him theihna turin Sawrkara hotu lu ber, Chief Minister thawkrim leh ngaihtuahna fim  kaihhruaina hnuaiah  hmalak zel anih thu  sawiin, natna chuan reh lam ai mahin zual lam a pan a,  thenawm hnai State leh ramah a kai an pun tak zel  avangin fimkhur angai tak meuh a ni, a ti a. Eng ram mahin duhthusam inpuahchahna an nei thei lo a, hripuiin  kan ram min chim buai tak tak chuan thawktu leh hmanrua in a daih dawn lo tih hriat sa ani a, fimkhur chu kan invenna damdawi tha ber a ni, a ti a.  Covid-19 chu  natna hriat chian harsa tak,  zirchian mek, a vei tam zawkte ah langchhuak mai lova awm anih avangin engtiknge a lo thlen ang tih a hriat loh a, abikin ramri depah inpawhtawnna tha tak lo awm tawh thin  mahse fimkhur  angai zual a ni, a ti a. Hripui len hnua tampui a thlen lohna tur leh ei leh bara intodelh anih theihna turin  khawtinte chu tanla sauh sauh turin  a chah a. Ei leh bar tharchhuah leh a hralhna lam chena ngaihtuah saktu tur District Level Committee nimin lama din tura hmalak anih thu sawiin, Champhai chu ei bar thar chhuah kawnga theihna sang tak nei anih avangin, taima lehzualin State pum chawm thei tura hmalak kan tum dawn a ni, a ti bawk. Covid-19 laka Mizoram kan him theihna tur chuan pawl bik sawi lova  rilru thianghlim tak pu chunga tanrual a ngai a,  tumah inla hrang bik lovin a tha zawk awm theihna turah  infinchhuah leh  thurawn inpek inthlahrung hauh lo ang u, a ti a. Mizoram mipuite tanruala lungrual taka  thawhhopuiah a sawm nghal  a ni.    

Pu Lalnunfela Chawngthu, SDO Sadar pawhin kan hma lawkah hripui len nasat ber hun  thleng mai theia chhut anih thu sawiin,  ramri atanga hripui a put luh lohna turin  tan mar reng a ngai a, hripui do bakah a hnu leha tam thleng thei kan ven tel angai bawk a ni, a ti a. Ei leh bar tharchhuah dan tur ngaihtuahin  tanlak mek zel anih thu leh line department-te kaltlanga thlai chi semchhuahte duhkhawp ni  rihlo mahse neih ang angte hmang tangkaia hmalak angaih thu a sawi a.  Nitina kan  thil tawn hi thil thar a ni a, engmah hriat lawk leh sawi lawk theih anih loh avang hian thawhhona tha kan mamawh a, harsatna awmte hotute hnena thlen hreh loh tur a ni, a ti a. Hripui  laka  fihlim tur leh tumah chhuanchham bik awm lohna turin lungrual taka Mizoram pum anga tanlak ho zel angaih thu a sawi bawk.    

Dr ZR Thiamsanga chuan vawiin hian Champhai Zote, Ngur, Vapar leh Murlen khuate tlawhin VLTF-te a kawm bakah ramri hrula rammu mek Fartlangkai leh a chhehvela duty-te a hmuna  kalchilhin a tlawh a ni.  VLTF leh Tiau kama duty-te chuan Champhai North bialtu MLA leh Covid-19 Medical Operational Team Chairman nibawkin hun hlu tak senga a hmuna kalchilha a tlawh avangin lawmthu an sawi a. Tiau dep khuate tunhma atanga lo inkalpawha inhnimhnai tak an nih avangin fimkhur zual angaih thu an sawi a.  Intlawhtawn, hnathawh pawlh  leh bungraw inlaktawnte awm lo tura an  venhim tlat thu leh ram leh hnam himna tura an beih chhunzawm zel dawn thu an sawi a. Sawrkarin mipuite hmakhua ngaia mamawh angte a theih leh remchan dan ang zela a chhawpchhuah thin avangin lawmthu an sawi bawk a ni. 

Champhai North bialtu MLA hian VLTF duty leh ramri venga rammute tan hian  an mamawh tur hrang hrang; Buhfai, Solar lantern Mobile phone charge theihna, Torch light,  Mask, Thosilen, Thlai chi, Silpauline, Kut silfaina Sahbawn, Sanitiser, Odomus leh Chawhmeh leina turte a pe a ni. Zote MNF Unit 1 leh 2 te hnen atangin Rs 2,500/- ve ve, a vaiin Rs 5,000/- CM Relief Fund a chhunluh tur a dawng bawk. Dr ZR Thiamsanga hi Pu Lalnunfela Chawngthu, SDO Sadar; Dr Lallawmkima, DIPRO leh khawtlang hruaituten an tawiawm a ni.