Nimin leh vawiin khan Lawngtlai Bawrhsap Pi Shashanka Ala, IAS chuan COVID-19 hri leng dona kawnga hma lakna pakhat, Lawngtlai District khawchhak lama India leh Myanmar ramri pal tlanga lut leh chhuak an awm loh nana ralvenga awmte chu a hmunah kal chilhin an dinhmun a enfiah.

Lawngtlai Bawrhsap hian nimin khan Archhuang kaia tlawmngai pawlte ralvenna hmun tlawhin, vawiin khan Saisih chhuaha tlawmngai pawlte ralvenna hmun a tlawh a. Hemi rual hian Tui chhak lam khaw hrang hranga village level task force (VLTF)-te tlawhin, Bualpui NG leh Sangau Sub-Headquarters YLA hruaitute nen ramria ralven dan chungchang an sawi ho va. Sangaua Assam Rifles hmun pawh tlawhin, an hotute chu ramri ven himna chungchang a sawipui bawk.

He'ng ramria tlawmngaia ralvengte leh a viltu VLTF-te hi Bawrhsap chuan an mamawha an hman atan silpauline leh tanpuina pawisa fai a hlan a. VLTF leh ramria ralvengte hian an dinhmun leh hna thawh dan te, an harsatna te a hnenah hian lo thlenin, ramri chu him taka ven a nih thu leh ramri kana lut leh chhuak tu mah an awm loh thu an sawi a. Ramri vil tura sawrkarin Mizoram Armed Police mi leh sa a dahte chuan indaih zawka tlawmngai pawlte ralvenna hmun an vilpui theih nan MAP duty dah belh turin Sub-Headquarters YLA hruaitute leh VLTF-te chuan Bawrhsap hi an ngen bawk a. Bawrhsap chuan an mamawh ang ang chu a theih anga bawhzuisak a tum tur thu a hrilh a ni.

Lawngtlai Bawrhsap chuan COVID-19 hri leng laka Mizoram leh Lawngtlai District a him theih nan ramria ralvenga awmte chu an pawimawh hle tih sawiin, tha thlah lova ram leh hnam tan thahnem ngai taka thawh chhunzawm turin a chah a. Mipuite pawh lo ralmuang ringawt lo va, sawrkarin an himna atana dan a zam hrang hrangte an zawm theih nan khauh taka kengkawh turin VLTF-te chu a chah bawk.

Archhuang kaia Tuipui dung ramri hi Bualpui NG Sub-Headquarters YLA (Young Lai Association) ruahmanna hnuaiah YLA branch parukin an inven chhawk thin a. Hei bakah hian Siachang chhuah, Vaphei chhuah leh Tialdawngilung kai te chu branch mal theuhin an vil bawk a. Sangau Sub-Headquarters YLA ruahmanna hnuaiah YLA branch pasarihin Tuipui dung hmun sarih - Pangkhaw chhuah, Ralven chhuah, Zukpul chhuah, Saisih chhuah, Thanngerh chhuah, Hmunchhun chhuah leh Fungsih chhuahah te ramri hi an veng bawk.