No.938/2020-2021

Dr. Harsh Vardhan, Union Health Minister hovin India hmarchhak Health Minister leh Health officials ten vawiin khan Video Conferencing neiin COVID-19 dona kawnga hmalak dan leh dinhmun te an thlirho a, Health Minister Dr. R. Lalthangliana pawh telin Union Health Minister hnenah hian  India ram pawna chhan hrang hrang vanga mizo tangkhang mekte hruai haw an nih theih nan hma lak sak turin a ngen.

Dr. R. Lalthangliana chuan Video Conferencing ah hian thusawina hun tha tak changin India ram pawna Mizoram mi leh sa 500 chuang zet, a tam ber chu thalai hnathawka chhuak, an awm tih thu sawiin India sawrkarin ram pawna tangkhang mi 15,000 vel a hruai haw tawh zingah Mizoram a chengte an la tel ve lo tih a sawi a, him dam taka hruai haw an nih chu Mizoram sawrkar pawhin a ngai pawimawh hle tih sawiin a rang lama hma la turin a ngen a, Union Health Minister chuan theihtawp lo chhuah a tum thu in a chhang a ni.

Dr R. Lalthangliana chuan COVID-19 do kawnga Mizoram sawrkar hmalakna hrang hrang sawiin Chief minister kaihhruaina hnuaiah ruahmanna fel tak siam anih thu a sawi a. Rapoid Antibody Testing mumal taka kalpui  anih thute, Zoram Medical College (ZMC) chu COVID-19 dedicated hospital a ruahman a nih thu leh tha taka kalpui mek a nih thu leh ZMC a sample testing laboratory ah pawh saple test tluang taka kalpui a nih thu te, District tinah Covid care Centre (CCC) siam a nih thu leh Dedicated Covid Health Centre (DCHC) ruahman fel a nih thu sawiin, heng DCHC ah te hian ICU a awmlohna ah pawh Isolation Ward dah vek a nih thu a sawi a ni.

Health Minister chuan State pawn atanga rawn lute screening uluk taka neih thin a nih thu leh sawrkar quarantine facilities ah khunghran zel an nih thu sawiin, Mizoram chu International border pahnih Myanmar (404 kms) leh Bangladesh (318 kms) nen in ri a nih avangin luhruk theihna hmun 200 chuang a awm avangin ven hna a hautak em em a ni tih Union health Minister hi hrilhin Mizoram Police leh Village Task Force ten rim tak leh chhel taka chhunzxan zawma an vil thu a sawi a, Village/Local Level Task Force chu Sawrkar, NGO leh khawtlang hruaitute tang tlangin an din a nih thu sawiin hei hian thawhhona tha tak a siam phah a ni a ti a. Anni bakah Chief Secretary kaihhruaina hnuaia District Level Lask Force, State Level Task Force, Health Department, home department leh sawrkar department hrang thangte thawhhona fakawm a tih thu leh India ram pum tan pawh entawntlak ni a a hriat thu a sawi bawk.

Health Minister chuan Mizorama COVID-19 vei pakhat enkawl mek chu a dam tawh thu leh vawiin hian damdawiin atang chhuah tir a nih thu a sawi bawk a, Mizoram chu India ram lock down a nih hma a lockdown lo kalpui tawh an nih thun leh Airport screening pawh a ti hmasa ber a nih thu sawiin tun dinhmuna kan la him chhan pawh heng vang hi a ni pakhata a hriat thu a sawi a, COVID-19 chungchanga India ram hmun hrang hranga Mizo awmte  dinhmun a tarlan bakah Mizoram chu nausen thihna (Infant Mortality Rate) ah nikuma IMR 15 chu kuminah 5 ah a tlak thlak thu leh India rama a titha ber pahnihna an nih tak thu a sawi bawk a. Hengte hi thawktute inpekna leh mipuite tawiawmna bakah Pathian malsawmna leh khawngaihna vang liau liau a nih thu a sawi bawk a ni.

Union Health Minister pawhin Mizoramin COVID-19 do kawnga hma a laknaah a lawmthu sawiin, a bik takin YMA te chu lawmthu a hrilh a, a hminga chibai pawh lo hlan turin Mizoram Health Minister hi a chah a. Mizoram pawna tangkhangte pawh an lo let nan theihtawp an chhuah tur thu te, karkhat chhung leka PCR Laboratory an ti puitling theite lawmawm a tih thu a sawi bawk.

Mizoramin tunhnaia report chhuaka Nau thihna (Infant Mortality Rate/IMR) rampumah ti tha ber dawttu a ni thei a, nikum lama IMR 15 chu 5 a a tla ta leh Kerala ai pawha Mizoramin a ti tha ta chu lawmawm an tih thu Central Team hian an sawi bawk a ni.

Dr. R. Lalthangliana chuan Sawrkarv laipuiin Mizoramin COVID-19  leh hriselna tihhmasawnna tur thil hrang hranga mamawh a thlente a ngaihtuahsak thin avanga lawmthu sawiin, Hmarchhak bik puala Video Conferencing a buatsaihsak avangin lawmthu a sawi bawk a, hun remchang hmasa berah India hmarchhaka Health Minister zawng zawngte nen hmaichhana  inkawmhona hun siamsak turin a ngen bawk a ni.

Union Health Minister hi Ashwini Kumar Choubey Minister of State for Health and Family Welfare leh official pawimawh ten an tawiawm a. Health Minister Dr. R. Lalthangliana hi Health secretary Pu H. Lalengmawia, Director of Health Services Dr. Lalchungnunga leh National Health Mission Director Dr. Eric Zomawia ten an tawiawm a ni.