1385/2022-2023

Champhai, the 28th July, 2022: All India Karate Championship 2022, July ni 15-16 chhunga Bilaspur, Chhattisgarh-a neih zawh taka Mizoram aiawha Champhai atanga tel medal la te chawimawina, Champhai District Karate Association (CDKA) buatsaiha Vanlallawma Indoor Stadium (VANIS), Champhai Kahrawt Venga neih chu tukin dar 8 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui a, Medal late hnenah chawimawina thuziak cheimawi leh pawisafai a hlan a. CDKA hnenah kick pad leina tur sum a hlan bawk. 

H&FW Board Vice Chairman Dr. ZR Thiamsanga chuan India ram pum inelna lianah Mizoram aiawha Champhai atanga kal awm chhun pahnihten medal bikim Gold, Silver leh Bronze medal pakhat theuh an hawn thei chu lawmawm tiin hruaitute leh zirlaite inpekna fakawm a ti a. Infiamna huangah mizote kan duai bik loh zia sawiin, khawvel deng chhuaka kan lar theihna tur pakhat chu infiamna huangah hian a ni, a ti a. Sawrkarin infiamna chawisan kawngah theihtawp a chhuah chhunzawm zel dawn thu leh MLA ang pawha tanlak zel a tum thu a sawi a. Medal hawntute chu entawntlak a tih thu leh midangte tana  chona nasa tak an siam thu sawiin, an phu  anga chawimawi tawk ni lo mah se thinlung taka lawmpui an nih thu leh an hmabakah puih a inhuam reng thu a sawi a ni.

Champhai North bialtu MLA Dr. ZR Thiamsanga chuan Champhai chu infiamna kawnga theihna nasa tak nei leh hmingtha thin tak a nih thu sawiin, hmingthat tawhnate chhawmnung zel tum turin thalaite a fuih a. Infiamna huanga intihsiakna atanga certificate neihte nakin zela chhawr tangkai theih a nih thu a tarlang a. Thalaite chu nakin lawka ram leh hnam innghahna tur tak tak an nih avangin zuk leh hmuam, ruihhlo dangte laka fihlim tur leh nun uluka fimkhur turin a chah a. Hlawhtlinna changte leh Champhai District Karate Association-te an kalzelna turah duhsakna a hlan a ni.

He hun hmanpuitu District Bawrhsap Pu James Lalrinchhana chuan infiamna huanga Mizoram ti hmingthatu Champhai District-in a nei chu chhuanawm tiin, Champhai District-ah Karate zirna tha tak kalpui a ni chu lawmawm a tih thu leh vanneihthlak a tih thu a sawi a. Martial Arts chu mahni inven nan mai bakah chak lo zawk leh puihna mamawhte venna tura hmanraw tha tak a ni, a ti a. Infiamna chu taksa, rilru leh thlarau nun hrisel tak siam nana pawimawh a nih thu a tarlang bawk.

Bawrhsap chuan infiamna hmangin thalaiten hlawhtling taka ruihhlo an do tawh thu sawiin, kalkhawmte chu ruihhlo leh nun hrisel lo do a infiamna chawisang zel turin a fuih a. Thalaite chu ram leh hnam chhan nana hman tlak taksa leh rilru hrisel tak nei thei tura inthununna tha tak vawn nun tum zel turin a sawm a. Karate Association hruaitute leh zirlaite inthununna leh inpekna chu fakawm tiin, Champhai District-a Karate chawilar kawngah theihtawp chhuahpui a inhuam thu a sawi bawk.

He hun hi Pu JH Nokapthanga, President, Champhai District Karate Association chuan a kaihruai a. Technical report Sensei Lenghmingthanga hnen atangin ngaihthlak a ni a. Pi R.Lalkhawngaihi, Secretary-in report a pe a, lawmthu sawiin hun a khar a ni.

Tun dinhmunah Champhai khawpui chhungah hian Karate zirna hmun Dojo 4; VANIS Kahrawt, Vengthar, New Champhai leh Kanan Veng-ahte awmin zirlai 100 bawr vel an awm mek a ni. 

Kumin July ni 15-16 chhunga Bilaspur, Chhattisgarh-a  All India Karate Championship neih zawh taka All Mizoram Karate Association (AMKA) aiawha kal Champhai District Karate Association zirlai pahnihte chuan medal pathum an la a. C.Lalruatsangi D/o C.Zohmingmawia (L) Kahrawt Veng chuan Sub Junior Girls Category Kata (dance) ah Silver Medal la in, Kumite (sparring) kg 45 chunglam Category-ah Gold medal a la bawk a. PC Lalremruati D/o Lalthangmawia, Vengsang Project Veng chuan Senior Female, kg 68 chunglam Category Kumite (sparring) ah Bronze Medal a la bawk a ni.

All India Karate Championship 2022 ah hian All Mizoram Karate Association (AMKA) chuan player 22 leh official 4 a tir a. He Championship-ah hian India ram State hrang hrang atangin player 2,300 vel zet an fuankhawm a. Mizoram team hian Gold Medal 2, Silver Medal 3 leh Bronze Medal 9, avaiin Medal 14 an rawn hawn a ni.

Attachment

  • Loading attachment...