No.2226/2020-2020 

Vawiin khan Champhai North bialtu MLA Dr. ZR Thiamsanga, Vice Chairman, Health & Family Welfare Board leh Covid-19 Medical Operational Team Chairman ni bawk chuan Champhai District Hospital hman turin Mizoram Teachers Federation (MTF) te thawh Ambulance chu District Medical Superintendent Dr. Zatluanga hnenah chahbi pein a hlan. Champhai North MLA hian Champhai districta Mini RT-PCR Truenat Quatro bunna tur hmunhma enfiahtu mithiamte tawiawm bawkin, hemi hnu hian Hospital Eye Ward ah Press Meet a nei bawk a ni.

Dr. ZR Thiamsanga chuan vawiin hun chu Champhai district tana bung thar, ni chhinchhiah tlak tak a ni, a ti a. Mizoram hmun hrang hranga Covid-19 dona tura in volunteer zawng zawngte chhuanawm tiin, State sawrkar CM Pu Zoramthanga  kaihhruaiin theihtawp chhuah avanga India rama ti tha ber kan ni thei leh Health Minister hmalaknaa a Covid-19 do hna chak taka kalpui ani chu entawntlak hle a a hriat thu a sawi a. Champhai hmunah Mini RT- PCR an tih mai  Truenat Quatro din thei tura hmalak anih thu leh endiktu ten endik hna pawh an zawh tawh thu a sawi a, an thil hmuh leh hriat angte sawrkara thlena thurawn an pek dawn thu sawiin, tun atanga hun reiloteah Covid-19 mai bakak natna dang Hepatitis, Typhoid, TB, Malaria leh adangte thlenga finfiah thei khawl bunfel tum ani, a ti a. Covid dona kawnga  thawktu hrang hrangte thahnemngaihna leh thawhhona tha tak avangin natna khuahkhirh a ni rih a, Community spread  pawh a awm lo a ni, a ti a.  Ral hmatawnga ding,  hrehawm pawisa loa thawhktute avangin tiang dinhmun hi kan thleng a, thawktu a te ber atanga a lian ber thlengte ram leh hnam tana an inpekna chu ngaihsanawm a tih thu a sawi bawk.

Tun thlengin Health department hmalakna atan  CM in cheng nuai 2100 chuang phal taka a pek tawh thu leh Health Minister kaihhruai hnuaiah chak taka hmalak zel a nih thu a sawi a. Truenat Quatro khawl  bun tum chuan nikhatah sample 40-48 a en thei dawn a, Covid-19 natna mai bakah Hepatitis, TB, Typhoid, Malaria leh a dangte chenin a finfiah theih dawn avangin district tan a chhenfakawm hle dawn  a ni, a ti a. Biosafety Cabinet order tawh ani a, Mini RT PCR Truenat Quatro chu Champhaiah bunfel thuai tum niin, MLA ten theihtawp chhuaha an tanho zel tur thu a sawi a. Covid-19 Medical Operational Team Chairman chuan Champhai district a Covid-19 positive sample thawn 5 zinga 4 te an negative thu hriat anih thu sawiin, Champhai district a  thawhhona chu tha hle a a hriat  thu leh chhawmnung zel tura a duh thu a sawi bawk.

Ambulance inhlanna hun hi Champhai Bawrhsap Pi Maria C.T Zuali chuan a kaihruai a. Dr. Zatluanga, DMS chuan lawmthu sawina hun hmangin a khar a ni.

Champhaia Truenat Quatro bunfelna tura hmun ruat, Dental OPD tura sak building hrang hlak chu sawrkar tirh Expert Team Member Dr. H.Lalhlenmawia, HoD, Dept of Pharmacy, RIPANS, Zemabawk, Dr. Vanramliana, Asst Professor, Dept of Zoology, PUC leh Dr. Krossnunpuii, Microbiologist, District TB Centre (DTC), Aizawlte chuan an enfiah nghal a. Aizawl lam atanga lokal Expert team member Dr. H.Lalhlenmawia leh Dr.Vanramliana, Asst Professor Dept of Zoology, PUC te chuan Covid-19 RT PCR Diagnosis Laboratory din anih theihna tura endikna atanga an thil hmuh dante an sawi a. Lunglei en fel tawh niin Champhai dawtah Siaha en leh an tum  thu an sawi bawk.

Hemi hnu hian Dr. ZR Thiamsanga hian District Hospital Eye Ward ah Press Meet a nei a. MJA Champhai district tan Laptop leh Printer bakah Sanitizer engemawzah MJA President Pu Lalhmingmawia Pachuau hnenah a hlan ani.