No.2225/2020-2020 

Tukin khan Dr. ZR Thiamsanga, MLA, Vice Chairman, Health & Family Welfare Board chuan Champhai Police Station a CCTV 6 leh Khankawn Police Check Post a 3 te chu tangkai taka hman turin Champhai Police Station-ah a hawng.

Dr. ZR Thiamsanga chuan Police Station mai nilo hmun pawimawh laiahte  CCTV dah a tul thu sawiin, Home department in  hmahruaia hma a la chu fakawm tiin, CCTV vuah thar chuan Champhai khawpui himna a thlen ngei a beisei thu a sawi a. Khawpui leh hmun pawimawhahte pawh a tul ang zela dah thei turin MLA dangte nen enzui an tum thu a sawi bawk. Mipuite himna tura Police te hnathawh fakin, Police te chu ral hmatawnga ding frontliner zinga mi an nih thu leh an hnathawhah Sawrkar a lawm thu a sawi a. Ramri dep leh bial zau tak nei Champhai DEF thuamthat leh mamawh phuhruk kawngah hmalak zel anih tur thu sawiin, Covid-19 beihna kawnga Champhai Police te hnathawh chu chhuanawm a tih thu a sawi bawk.

Champhai SP Pu Rex Zarzoliana chuan  CCTV hawnna hun hmanpuitu Official, khawtlang hruaitu leh Media chungah lawmthu sawiin, Champhai Police Station ah CCTV 6 leh Khankawn Police Check Post ah 3 bunfel anih thu leh hengte hian Police Station a chetvelna leh Champhai khawpui lut chhuak lirtheite chetvelna chu ngun takin a thlithlai thei dawn ani, a ti a. Khawpui himna tura hmanraw pawimawh tak CCTV chuan Police te hnuchhui kawngah nasa taka a puih thin thu sawiin, Sawrkar hmalakna kaltlanga Champhai Police Station leh Khankawn Police Check Post-a CCTV bunfel a ni ta chu lawmawm a ti a. CCTV chuan Malkhana, Police Station dawrtute, Custody a awmte chinchang leh Check Gate-a Lirthei lut chhuakte ngun taka a vil reng dawn avangin a tangkai hle dawn a ni, a ti bawk.

He hunah hian  Dr. ZR Thiamsanga chuan Champhai Police Station Officer in Charge (OC) Pu H.Vanlalthanga kutah tanpuina Rs 10,000/- , Sanitizer leh kutsilfaina engawmzah a  hlan a ni.