1544/2023-2024

Champhai the 17th August, 2023 – Vawiin khan MZP Hqrs Champhai buatsaihin Government Champhai College Multipurpose Hall-ah Career Guidance Program hman a ni a. Champhai North bialtu MLA & Vice Chairman, H&FW Board Dr ZR Thiamsanga chuan khuallian niin a hmanpui.

Career Guidance Program-ah hian Higher Secondary School zirlaite an tel a. Pu Vanlalvura Ralte, Asst Commissioner, Excise & Narcotics Department, Pi Vanlalnunpuii Ralte, SDC Champhai, Ralte Zodingliana, Advocate leh Francis Lalmalsawma Sailo, Entrepreneur te Resource person an ni a. Civil service, law & judicial, entrepreneurship chungchang te bakah ruihhlo hlauhawmna chungchang an zirho a. Zawhna leh chhanna hun tha tak an hmang bawk a ni.

Career Guidance Program hawnna inkhawm ah hian Dr ZR Thiamsanga chuan thu sawiin, Covid-19 hrileng avanga harsatna nasa tak kan tawh hnuah Mizoram chuan harsatna khirh tak tak engemawzat - lirnghing, vawk hri leng, fall army worm, ramri buaina, Myanmar leh Manipur buaina avanga raltlante buaipui chhoh a ngai a, heng te avang hian hmasawnna hna te pawh duh angin a thawh chak thei lo a ni, a ti a. Heng harsatna hrang hrang karah hian Sawrkar chuan theihtawp chhuah zelin zirna kaihhnawih ruhrel te pawh ruahman belh zel a ni a. Champhaiah pawh MYC Coaching Centre ruahman tawh niin Mega Hybrid IAS programme kalpui mek a ni a; Champhai Nursing School pawh peih fel tawh niin naktuk maiah H&FW Minister Dr R. Lalthangliana’n a hawng dawn a. Hemi bakah hian Champhai Medical College leh MZU Eastern Campus hawn  anih theihnan hmalak zel a tum thu Champhai North bialtu MLA chuan a sawi a. Zirlaite chu ram leh hnam veina thinlung an neih chhoh ve a tul thu sawiin an thiamna leh an theihna te khawtlang hmasawnna atana hman tum zel turin a chah a. Mizo zirlaite thlavang hauh kawngah leh ram leh hnam humhalh kawngah MZP chu a hmatawngah awmin huaisen takin hma an la thin chu fakawm a tih takzet thu pawh sawiin khawtlang tana an hnathawh leh an inpekna avangin an chungah lawmthu a sawi bawk a ni.