1545/2023-2024

Mizoram Rural Development Pu Lalruatkima chuan nimin ni 16.8.2023 khan Ministry of Rural Development, Govt. of India hnuaia mi pawimawhte a dawr chhunzawm a, Pu Shailesh Kumar Singh, RD Secretary chu a pisaah hmuin Mizoram mamawhte a sawipui.

Union RD Secretary Pu Shailesh Kumar Singh chuan Ni 100 inhlawhna pawh tun financial year atan Mizoram tan an sanction tur thu a lo hrilh a, Ni 100 inhlawhna kalpui kawngah Mizoramin hna a thawh that em avangin, duhsak bik pawh a inthlahrunawm loh thu leh State dangte pawhin Mizoram hi hemi kawngah hian entawn vek se a duh thu Minister Pu Lalruatkima hi a lo hrilh bawk. Union RD Secretary hian RD hnuaia Cluster Facilitation Project (CFP) kaltlanga Ministry lamin Mizoram tana pawisa an la pek chhuah loh awm ang angte pawh karleh lamah chuan rawn release hman an tum thu Minister hi a hrilh bawk a ni.

Rural Livelihood Mission hnuaia scheme pakhat 'Ajeevika Grameen Express Yojana' (AGEY), thingtlang lama Self Help Group ten eizawnna atana an hman tur lirthei pek chhuah chungchang pawh Mizoram tan an release thuai tur thu a hrilh a. Hemi atan hian Ministry lama a khawihtute pawh Secretary hian Minister nena an inkawm lai hian sanction pawh buaipui nghal turin thu a pe nghal bawk a ni.

Union Rural Development Ministry Secretary hian Mizoram rawn kal a chak thu Minister hi a hrilh a, inthlan hma ngeia rawn tlawh a tum thu a sawi bawk a ni. RD Minister Pu Lalruatkima hi Pi Ethel Rothangpuii, Joint Secretary, RD Department, Govt. Of Mizoram in a tawiawm a ni.