3738/2022-2023

Champhai, the 2nd March, 2023: Champhai District Drugs Disposal Committee leh District Level Narco Coordination Centre (NCORD)  Champhaite tangkawp buatsaihin Champhai District Police ten April, 2022 leh September, 2022 inkara tum 27 ruihhlo an man, case kal lai mek (Pre-trial) tihral phalna hmuh tawh, a hlut zawng tualchhung rate-a Rs. 17,38,60,000 (cheng nuai 1738.60) man hu chu vawiin chawhnu dar 3:00 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan District Hospital Champhai bawlhhlawh halralna Incinerator-ah mei depkaiin a halral a; Police leh Nasha Mukh Bharat Abhiyaan (NMBA) Volunteer-te hnenah tanpuina sumfai a hlan nghal bawk.

He hun puala District Hospital Complex-a hun hmanah khuallian Dr. ZR Thiamsanga chuan ruihhlo do kawnga Champhai District-a thawhhona tha leh duhawm tak awm chu fakawm tiin, chhun leh zan pawh sawi lova ruihhlo do kawnga theihtawp chhuah a ni thin chu chhuanawm a tih thu a sawi a. Damdawi siam chhuah leh tawlhruk tamna Golden Triangle bulhnai leh Indo-Myanmar border-a awm Champhai District-a ruihhlo dona ah harsatna tam tak tawh thin a nih thu a sawi a. Pawisawilo mihring nunna tam tak suattu, mimal, ram leh hnam tluk chhiat bultanna tha thlah lova do zel a ni chu ropui tih thu a sawi a. Ruihhlo khawih chhin lo tura inzirtirna nasa zawk neih a pawimawh thu sawiin, Indo-Myanmar border-a awm Champhai District-ah NCB Branch Office dah a ni tur chu lawmawm tiin, Hnahlan-ah Police Station hawn tuma hmalak mek zel a nih thu a sawi bawk.

Indaihlo leh hmanraw mamawh angte pawh neilo chunga Police leh Force dangten thahnemngai taka ruihhlo an do thin chu chhuanawm a tih thu a sawi bawk a. An inpeknaah Champhai District aiawhin lawmthu a sawi a. Ruihhlo do kawngah tumah an bang bik loh thu leh mitinten mawhphurhna an neih vek thu sawiin, nakin lawka ram leh hnam tana innghahna tur thalaite nun venhim kawngah theihtawp chhuah tlan a pawimawh thu a sawi bawk.

Thusawitu dang District Bawrhsap Pu James Lalrinchhana, Chairperson, NCORD Champhai District chuan ruihhlo man tur a awm zel chu veiawm tiin, ruihhlo tawlh leh zuarte lungrual taka do zel tum a ni a, man chhuah angte kan halral zel dawn a ni, a ti a. Sawrkarin ruihhlo do a ngaih pawimawh thu sawiin, NMBA leh NCORD kaltlangin ruihhlo do kawngah District level-ah pawh hmalak mek zel a ni, a ti a. Champhai Vengsangah NCB Branch Office tur enfiah a nih thu sawiin, thuneihna sang tak nei a nih angin case lian leh sang zawkte a chingfel thuai thei dawn a, a nghahhlelhawm tawh hle a ni, a ti a.  Drugs do leh man kawnga NGO, Kohhran leh Media ten Sawkar an tawiawm thin chuan Sawrkar tha an tih chak thu a sawi a. Ruihhlo tam tak man chuan kan tanrual zia a lantir a ni, a ti a. Ramri depa awm kawngkhar vengtu pawimawh tak kan nih avangin tha kan thlah thiang lova, kan beih chhunzawm zel dawn a ni, a ti a. Ram leh hnam venhim kawngah force mite hmalakna chhuanawm tiin, huaisen leh rinawm taka theihtawp chhuah chhunzawm zel turin a chah a ni.

Champhai Police-te ruihhlo man vawiin chawhnua halral takte hi heroin hawng 338 (Kg 4.479), a hlut zawng tualchhung rate-a cheng nuai 101.40 leh methamphetamine kg 90.65 (mum 8,18,600), tualchhung rate-a a hlut zawng cheng nuai 1637.20 te a ni a. Ruihhlo halral zawng zawng hlut zawng hi tualchhung rate-a cheng nuai 1738.60 man hu a ni.

Champhai District Police-te chuan kum 2023 January leh February thla chhung hian ND&PS Act hnuaiah Case 17 an ziaklut tawh a; hemi kaihhnawihah hian mi 22 man tawh niin, heng zinga 4 te hi ramdang mi an ni. Heroin man tawh zawng zawng zat hi gram 2829.96 (Hawng 224) a ni a, a hlut zawng hi tualchhung rate-in Rs. 67,20,000/- (cheng nuai 67.20) a ni. Ganja Kg 6.35, tualchhung rate-a a hlut zawng Rs. 9,525/- man hu an man tawh bawk a. Alprazolam mum 450 (gram 30), Rs. 15,000/- man hu man a ni tawh bawk.

Vawiin ruihhlo halralna puala hun hman hi Pi Lalnunmawii Varte, DSP Hqrs. Champhai chuan kaihruaiin Pu Lalrinpuia Varte, SP Champhaiin kalkhawmte lawmna thu a sawi a. Addl. SP Pu C.Lalengliana'n ruihhlo man halrai turte chungchang report a pe a. Pu Gaurav Tyagi, IPS, SDPO Champhaiin lawmthu sawiin hun hman a khar a. Ruihhlo halral turte enfiah a nih hnuah halralna hmunah khuallianin mei depkaiin a halral a ni.

He hunah hian Champhai District NCORD member-te, Police, Sub Hqrs. YMA hruaitute,  NMBA Volunteer Govt. Champhai College-a Zirlaite leh Chanchinbumite an tel a ni.

Champhai District Police chuan ruihhlo do kawnga mipui, NGO leh media-te tawiawmna tha tak an dawn thin avangin lawmthu an sawi a; hmalaknate țawiawma thlawp zel turin an sawm nghal a ni.