1407/2022-2023

Champhai, the 29th July, 2022: Champhai District chhunga hriselna kawnga thawktu hrang hrangte tana training Catholic Relief Services (CRS) leh Zoram Entu Pawl (ZEP) te tangkawp buatsaih chu vawiin chawhma dar 10:00 khan Circuit House Conference Hall-ah neih a ni a, he hun hi Health & Family Welfare Board Vice Chairman Dr. ZR Thiamsanga, MLA chuan khuallian leh resource person niin a telpui.

Khuallian Dr. ZR Thiamsanga chuan hriselna lam hawi inzirtirna tha tak Catholic Relief Services leh Zoram Entu Pawl-in an buatsaih chu Champhai mai nilo Mizoram pum tana pawimawh tak a nih thu sawiin tangkai taka chhawr a beisei thu a sawi a. Mipui rawngbawlsak kawnga an inpekna chu entawntlak tiin, an kalzelna turah duhsakna a hlan a, an hmalakna kawnga puih an tulna zawnah theihtawp chhuahpui a inhuam thu a sawi bawk.

Training resource person ni bawk Dr. ZR Thiamsanga chuan Covid-19 chungchang first aid, a lanchhuah dan leh enkawl dan chungchang zirtirna a pe a. Hriatchhuah hma a tul thu sawiin, nantna benvawn neite tan a bikin inchik ngun a ngai hle a ni, a ti a. Sawkar, VLTF, LLTF, NGO leh Kohhrante thawhhona tha tak avangin  tun hun hi thleng thei kan ni, a ti a. Khawsik sang reh theilo leh thawk lama harsatna awmte ngaihven thuai a tul thu sawiin, Covid test hrehlo turin mipuite a chah a. Covid-19 laka himna tura inkaihhruainate tha taka zawm chhunzawm zel a tul thu sawiin, hei hian Covid-19 mai bakah hrileng dang inkaichhawng turte pawh a veng thei a ni, a ti a. Hri danna vaccine lak chu invenna kawnga pawimawh tak a nih avangin vaccine lak hreh lo turin mipuite a chah nghal bawk.

He hun hmanpuitu District Bawrhsap Pu James Lalrinchhana chuan CRS leh ZEP te hmalakna peng hrang hrang a lo hmuh thin thu sawiin fakawm a ti a. Ramri hrula awm Champhai District-a hmasawnna kalpui mek karah hmasawnna tur rahbi hrang hrang a la awm thu a sawi a, hemi kawnga harsatnate buaipuia midangte tana thahnemngai taka penchhuaka thawktu an awm thin chu chhuanawm a ti a. District chhungah mahni intihlum leh rilru lama harsatna nei an pung ta viau chu pawi a tih thu sawii, mental health lamah tun aia nasa zawka tanlak a tul a ni, a ti a. Mithiam kalkhawmte chu rilru lama harsatnain taksaah nghawng a neih dan mipuite zau zawka zirtir tur leh a ven kawnga theihtawp chhuah turin a chah a; NGO, Kohhran leh puipunnaahte mental health chungchang sawi uar a tul thu a sawi bawk. Thawhhona tha tak neia midang tana malsawmna nih tum zel turin duhsakna a hlan a, puih an ngaihna zawnah Department leh District Administration a inhawn zel dawn thu a sawi a. CRS-ZEP buatsaih IEC Poster Mizo, Falam leh English tawnga siam chu a tlangzarh nghal bawk a ni.

He hun hi Pi Lucy Lalawmpuii Sailo, MEAL Officer, ZEP chuan kaihruaiin, Pu Savio, Project Officer, CRS in pawl hmalakna report a pe a. Rilru hriselna lam hawi inzirtirna, rilru buai leh a enkawl dan chungchang Pu T. Vanlalruata, Counselor, Govt. Champhai College chuan a zirtir a. Pi Catherine, Field Animator, ZEP in program khaikhawmna hun a hman hnuah Pu Lawrence, Project Coordinator, ZEP in lawmthu sawiin hun a khar a ni.

Catholic Relief Services (CRS) Mizoram chuan Zoram Entu Pawl (ZEP) Aizawl kaltlangin Champhai District-a khaw 16 ah te ngaihsak ngai zual bik, a bik takin raltlan tan hma a la a, eitur, hriselna leh faina, venhim leh tul dang chhawpchhuah sak kawngah hma nasa takin a la mek a. Chhinchhiah danin mipa 2606 leh hmeichhia 2705 te hnenah ei leh in tur mamawh zual an pe chhuak tawh a. Health safety kits raltlan chhungkaw 421 te pek tum a ni a. Covid-19  safety kits chhungkaw 1250 te pek an ni bawk a. Medical Health Camp tum 15 raltlan camp-ah te neih tum niin hemi kaltlang hian mi 1500 velte hriselna endik tum a ni a. Health Centre 5 te chhawmdawl niin, health centre hrang hrang atangin mi 15 ten professional training an lo nei tawh bawk a. Heng bakah hian raltlante tan Mizo leh Sap tawng inzirtirna te, naupangte inawmhlimna te, Covid vei enkawlna leh naupang rilru hriselna lam hawitea hmalak chhoh mek zel a ni.

Catholic Relief Services (CRS) leh Zoram Entu Pawl (ZEP) te hian thliar bik awm lovin Mizoramah hmasawnna tluantling, nakin zela harsatna thlen lo thei zawnga kalpui chu thupuiah an nei a. An hmalakna peng pakhat hnuaiah vawiin hian doctor, nurse leh community health worker-te pualin primary leh emergency health care, covid enkawl leh rilru hriselna lam hawite tinzawnin training hi an buatsaih a ni.

Attachment

  • Loading attachment...