1406/2022-2023

Mamit 29th July, 2022 : Vawiin khan MZP Headquarters, Mamit buatsaihin Chhimveng YMA Hall Mamit-ah zirlai titha chawimawina hun hman a ni a. Er. H. Lalzirliana, MLA, Vice Chairman, Roads & Infrastructure Development Board chuan khuallian niin he hun hi a hmanpui.

Khuallian chuan MZP Headquarters, Mamit-in zirlai titha chawimawina hun an buatsaih chu lawmawm a tih thu sawiin chhunzawm zel turin duhsakna a hlan a. Zirlaite chu puitlin lam pana hmalam pan zel tura chahin taima taka an zirlai an zir chuan sang tak an thlen ngei a beisei thu a sawi a. Kan zirna kawngah kan background that loh vang emaw ringawt chhuanlam lova midang aia tam kan zir phawt chuan hlawhtlinna chan theih anih thu a sawi a, lehkhabu tha chhiar tam turin a chah bawk.

Khuallian Mamit bialtu MLA chuan Mamit zirna in sangah, mahni in lum atang ngeia kan subject zir duh zawngte kan zir theih nan hmalak mek anih thu a sawi bawk.

He hun khualzahawm ni-a hmanpuitu Pu Lalnunhlua, Mamit District Bawrhsap chuan tumruhna leh taimakna nen tha taka lehkha zir chhunzawm zel tura chahin pass mark chauh duhtawk lova tum nei rana lehkha zir turin a chah a. Hlawhtlinna kan chan hunah pawh kan bula mite tana hnawksak leh tihreawmtu ni lo a midang tan malsawmna ni zawk turin a chah bawk.

Pu Chinkhanmanga Thomte, Asst. GS, MZP Gen.Hqrs pawhin zirlaite fuihna thu tha tak tak a sawi bakah Pi C. Lalremruati, DCPO, DCPU, Mamit-in naupangte dikna leh chanvo chungchang a sawi bawk.

He hunah hian Mamit khawpui chhunga HSLC Distinction a pass chin, HSSLC leh Bachelor Degree First Division a pass chin, an vaiin zirlai 96-te chawimawi an ni a. Chawimawina thuziak (Citation) bakah zirna atana tangkai tur lehkhabu hlan an ni.

He hun hi Pu Zobiaksanga, President, MZP Hqrs. Mamit chuan kaihruaiin Pu Lalkroshlua, Secretary, MZP Hqrs. Mamit chuan report a pe a ni.